काभ्रे,
रोशी गाउँपालिका वडा नं. ४ महादेवटारमा १५ दिने सीप बिकास तालिम सम्पन्न भएको छ । हिजो मंगलबार रोशी गाउँपालिका उपाध्यक्ष मिम बहादुर वाइबा ज्वालाको प्रमुख आतिथ्यतामा तालिमको समापन गरिएको हो ।
रोशी गाउँपालिकाको आर्थिक सहयोगमा बैशाख ८ गतेदेखि बाढी प्रभावित किसानहरुको लागि बाँस तथा निङ्गालोबाट डोको, डालो र मुढा बनाउने तालिम सुरु भएको थियो । तालिममा १६ जना किसानहरु सहभागी भएका थिए । यस १५ दिने सीप बिकास तालिमबाट सहभागीहरुले बाँस तथा निङ्गालोको चोयाबाट डोको, डालो र मुढा बनाएर आयआर्जन गर्न सक्षम बनेका छन् । तालिममा विना विकले प्रशिक्षण दिनुभएको थियो ।
तालिमको समापन गर्नुहुदै उपाध्यक्ष वाइबाले रोशीको बाढी प्रभावित क्षेत्रका किसानहरुका लागि तालिम दिएर आर्थिक उपार्जन तर्फ उन्मुख गराउदै आएको बताउनुभयो । पालिकाको पहल र बागमती प्रदेशसगको साझेदारीमा वडा न १२, ७ र ३ मा बेमौसमी तथा मौसमी तरकारी खेती सम्बन्धी र वडा न ११ मा मौरी पालन सम्बन्धी तालिम भैरहेको उहाँले जानकारी दिनुभयो ।
कार्यक्रममा रोशी–४ का वडाध्यक्ष तेजबहादुर मगर लगायत कर्मचारी, स्थानीय समाजसेवीहरुको सहभागिता रहेको थियो ।
