काभ्रे,
असोज दोस्रो साताको बाढीपहिरो प्रभावित रोशी ११ का वृद्धबृद्धालाई खाधान्न सामग्री वितरण गरिएको छ । शान्ति जन आदर्श सेवा केन्द्र र अक्सफर्मको सहयोग तथा वडा कार्यालयको समन्वयमा करम्बा डाँडाँका एकल महिला, एकल पुरुष र वृद्धअवस्था भएका गरि १९ घरधुरीलाई खाधान्न सामग्री वितरण गरिएको हो । वडा अध्यक्ष लाल कुमार पाख्रिन र शान्ति जन आदर्श सेवा केन्द्रका अध्यक्ष शंख बुद्ध लामाको उपस्थितिमा वितरण गरिएको हो । उनीहरुलाई चामल, दाल, तेल, नुन, चिनी, मस्यौरा बितरण गरिएको हो ।
कार्यक्रममा बोल्नुहुदै वडा अध्यक्ष लालकुमार पाख्रिनले शान्ति जन आदर्श सेवा केन्द्र विशेष गरि खानेपानी साथै अन्य विकासको क्षेत्रमा पनि अग्रणी संस्थाबो रुपमा रहेको बताउनुभयो । उहाँले आफ्नो वडामा पनि सहयोग गरेकोमा धन्यवाद दिनुहुदै घर खेत बगाएकोमा सरकारले समेत उल्लेखनीय सहयोग गर्न नसकेको र सरकारले मापदण्ड बनाउदै सहयोग गर्ने विस्वास व्यक्त गर्नुभयो ।
त्यसैगरि शान्ति जन आदर्श सेवा केन्द्र संस्थाका अध्यक्ष शंख बुद्ध लामाले राहत वितरण कार्यक्रम जिल्लाको रोशी, नमोबुद्ध, बेथानचोक ,तेमाल र पनौती नगरपालिकामा रहेको र विभिन्न दातृनिकायको सहयोगमा हालसम्म संस्थाले ६५००० जना व्यक्तिहरुलाई खानेपानी उपलब्ध गरेको बताउनुभयो ।
असोजको विपत्ती पछि मात्रै खाद्यान्न ५१९ घरधुरीलाई ६० किलोको दरले चामल र अन्य खाद्यान्न सामाग्री वितरण गरेको , न्यानो कपडा ६५० घरदुरीलाई र अन्य स्वच्छता सामग्री , डिग्निटी कीट, लगायतका सामग्रीहरु वितरण गरिएको समेत बताउनुभयो ।
उक्त संस्थाले जिल्लामा असोजको बिपत्ति पछि मात्रै अक्सफम सङ्गको साझेदारीमा १६ वटा खानेपानी र ३ वटा सिचाइ आयोजना मर्मत गरि हस्तान्तरण समेत गरिएको छ भने CRS नेपालको साझेदारीमा ३७ वटा खानेपानी र सिचाइहरु समेत मर्मत सम्पन्न गरेकोे छ ।
साथै बाढी तथा पहिरो प्रभावित करिब एक हजार घर परिवारलाई नगद समेत वितरण गरिएको थियो। त्यसै गरि संस्थाले जिल्लाको ५ वटा प्रभावित स्थानीय तहका १३२० घर धुरीलाई जस्तापाता वितरण गर्न लागेको र त्यसको लागि तथ्यांक संकलन भैसकेको समेत लामाले बताउनुभयो ।
कार्यक्रममा विकासका लागि महिला मञ्चका अध्यक्ष जेसुन लामा, तामाङ पत्रकार संघ जिल्ला सचिव अशोक बुद्ध लामा संस्थाका कर्मचारीहरु साथै स्थानीयहरुको उपस्थिति रहेको थियो । कार्यक्रम भने संस्थाका प्रतिनिधि तेमाल सिं लामाले संचालन गर्नुभएको थियोे ।
