काभ्रे,
काभ्रे जिल्लाको मण्डनदेउपुर नगरपालिकामा १५ बेडको अस्पताल भवन निर्माण हुने सुनिश्चित भएकोे छ । शुक्रवार सङ्घीय सरकारको स्वास्थ्य तथा जनसङ्ख्या मन्त्रालयले १८ करोड, ६ लाख ८२ हजार रुपैयाँ बजेटको स्रोत सुनिश्चित सहितको प्रतिबद्धता पत्र पठाएपछि अस्पताल निर्माण सुनिश्चित भएको हो । अब नगरमा यस अघि निर्माण सम्पन्न भएको ५ बेड सहित २० बेडको अस्पताल निर्माण हुने भएको छ । अनेकन् बाधा र व्यवधानका बिच नगरप्रमुखको विशेष अग्रसरतामा सङ्घ र नगरपालिकाको लागत साझेदारीमा १५ बेडको नयाँ अस्पताल निर्माण कार्यका लागि सम्झौता भई कार्यादेश दिई भवन निर्माणको काम सुचारु भएको हो । वडा नं. ७ मा निर्माण हुन लागेको सो अस्पतालका लागि नगरपालिकाको १३ औँ अधिवेशनबाट लागत साझेदारीका लागि चालु आव २०८०÷०८१ मा ४ करोड रुपैयाँको बजेट सुनिश्चित गरिसकेको नगर प्रमुख वाइबाको सचिवालयले जनाएको छ ।
अस्पताल सञ्चालनमा आएपछि नगरवासीसँगै काभ्रेपलान्चोक जिल्लाको पाँचखाल नगरपालिका, भुम्लु र चौरीदेउराली गाउँपालिका तथा मण्डनदेउपुर नगरपालिकासँग जोडिएका छिमेकी जिल्ला सिन्धुपाल्चोकको मेलम्ची नगरपालिका, इन्द्रावती गाउँपालिका, हेलम्बु गाउँपालिका, पाँच पोखरी थाङपाल गाउँपालिकाका नागरिकहरु समेत लाभान्वित हुनेछन् ।
