काभ्रे,
नेपालबाट गत आ.व मा झन्डै ११ करोड बराबरको अचार अन्य देसमा निर्यात भएको छ । भन्सार विभागकाअनुसार गत आर्थिक वर्षमा नेपालबाट १० करोड ९८ लाख ४४ हजार रूपैयाँको अचार निर्यात भएको हो । नेपालबाट अचार निर्यात १ सय ८५ प्रतिशतले बढेको पाइएको छ । त्यसअघिको आर्थिक वर्षमा भने जम्मा ३ करोड ८६ लाखको अचार निर्यात भएको थियो । विभागकाअनुसार गत आर्थिक वर्ष नेपालबाट अमेरिका, अष्ट्रेलिया, क्यानडा, जापान, वेल्जियम, इटाली, हङ्कङ, कोरिया र बेलायतमा १ लाख ६० हजार ६७२ किलो अचार निर्यात भएको छ ।
सबैभन्दा बढी अमेरिकामा ३ करोड ८८ लाख १९ हजार रुपैयाँको ४६ हजार ६ सय ७१ किलो अचार निर्यात भएको छ । एक जना अचार उत्पादक रेखा शर्मा चौधरीले विश्वमा नेपाली अचारको माग बढ्दै गएकाले सरकारले पनि आफूहरुलाई सहयोग गर्नुपर्ने बताउनुभयो । भन्सार विभागको तथ्याङ्कअनुसार गत आर्थिक वर्षमा नेपालमा १० करोड २ लाख १४ हजारको ३ लाख ७१ हजार किलो अचार आयातसमेत भएको छ । अघिल्लो आर्थिक वर्षमा भने ७ करोड ६४ लाख ६१ हजारको ३ लाख ६७ हजार ५ सय ५२ किलो अचार आयात भएको देखिएको छ ।
