काभ्रे,
काभ्रे जिल्लाको धुलिखेलमा घटेको घटना संसद्मा उठेको छ । विद्युतको खम्बामा काम गरिरहेका बेला करेन्ट लागेर मजदुरको मृत्यु भएको विषय आजको संसद्मा उठेको हो । प्रतिनिधिसभाको आजको बैठकमा बोल्नुहुदै माओवादी केन्द्रका सांसद सूर्यमान दोङ, रास्वपा सांसद शिव नेपाली, राप्रपाका प्रमुख सचेतक ज्ञानेन्द्रबहादुर शाही लगायतले यो विषय उठाएका हुन् । काभ्रेको धुलिखेलस्थित विद्युतको खम्बामा काम गरिरहेका बेला करेन्ट लागेर सर्लाहीको ईश्वरपुर नगरपालिका–१२ घारीबथाका २८ वर्षीय उज्वल (उपेश) परियारको शनिबार ज्यान गएको थियो ।
नेकपा माओवादी केन्द्रका काभ्रेबाट निर्वाचित सांसद सूर्यमान दोङले प्राधिकरणको लापरबाहीले मजदुरको ज्यान गएको बताउनुभयो । नेपाल विद्युत् प्राधिकरणमार्फत काभ्रेपलाञ्चोक वितरण केन्द्रद्वारा विस्तारित धुलिखेल नगरपालिका–७ जिल्ला प्रशासन कार्यालय अगाडिको विद्युतको खम्बामा काम गरिरहेका बेला परियारलाई करेन्ट लागेको थियो । प्राधिकरणले बिना सूचना नै बिजुली सप्लाइ गरेकाले करेन्ट लागेको आरोप छ । ‘हिजो काभ्रेमा एकजना मजदुरको ज्यान गएको छ, विद्युत प्राधिकरणको जिल्ला कार्यालयले बिजुली बन्द गरेको सूचना दिए पनि अर्को सूचना नदिई बिजुली सप्लाइ गर्दा काम गरिरहेका मजदुरको ज्यान गयो,’ सांसद् तामाङले भनन्नुभयोे, ‘विद्युत प्राधिकरणको गैरजिम्मेवारीले एक मजदुरले ज्यान गुमाए । यसको सत्यतथ्य जाँच होस् ।’
राष्ट्रिय स्वतन्त्र पार्टीका सांसद शिव नेपालीले घटनाको छानविन गरी कारबाही गर्न माग गर्नुभयो । कुनै पनि सूचना नदिई प्राधिकरणले विजुली छोड्दा उनको ज्यान गएको बताउनुभयो । यो ज्यान प्राधिकरणले लिएको समेत आरोप लगाउनुभयो ।
राप्रपाका प्रमुख सचेतक ज्ञानेन्द्रबहादुर शाहीले काभ्रेमा राज्यले मजदुरको हत्या गरेको बताउनुभयो । ‘पोलमा मजदुर चढेका बेला बिना सूचना बिजुली छोड्नु भनेको हत्या नै हो,’ सांसद शाहीले भन्नुभयो । यो घटनाको छानबिन गरि ज्यान मार्ने कसुरमा मुद्दा चलाउन समेत माग गर्नुभयो ।
