काभ्रे,रेडियो रोशी,
काभ्रे जिल्लाको तेमाल गाउँपालिकाले सामाजिक सुरक्षा भत्ता लिइरहेका जेष्ठ नागरिकहरूको सहजताको लागि वडा वडामै राष्ट्रिय परिचयपत्र शिविर सञ्चालन गरेको छ । गाउँपालिकाका अध्यक्ष चन्द्र लामाको नेतृत्वमा शारीरिक अशक्तता वा उमेरका कारण जिल्ला प्रशासन कार्यालयसम्म पुग्न नसक्ने लाभग्राहीहरूलाई लक्षित गरी यो शिविर सञ्चालन गरिएको हो ।
आज भदौ ७ गते पहिलो दिन गाउँपालिकाको वडा नं. ३ सरमथली स्थित भूमि माविमा र वडा नं ४ को वडा कार्यालयमा शिविर सञ्चालन भएको गाउँपालिकाका सामाजिक सुरक्षा तथा पञ्चिकरण इकाइका उद्दव प्रसाद पाण्डेले जानकारी दिनुभयो ।
शिविरमा वडा नं. ३ बाट १० जना जेष्ठ नागरिकहरूको राष्ट्रिय परिचयपत्र र २० जना जेष्ठ नागरिकहरूको सामाजिक सुरक्षा भत्ता नवीकरण गरीएको उहाँले जानकारी दिनुभयो ।
त्यसैगरी वडा नं ४ मा १३ जनाको राष्ट्रिय परिचयपत्र र २ जनाको सामाजिक सुरक्षा भत्ता नवीकरण गरीएको उहाँले जानकारी दिनुभयो ।
भोलि आइतबार बिहान ८ बजेदेखि वडा नं. ६ र १२ बजेदेखि वडा नं ७ मा शिविर सञ्चालन हुनेछ। क्रमशः सबै वडाहरुमा शिविर सञ्चालन हुने छ । सम्बन्धित सबै लाभग्राहीहरूलाई समयमै उपस्थित भई सेवा लिन गाउँपालिकाले अनुरोध गरेको छ।
गाउँपालिका प्रमुख लामाले शिविरले गाउँमै राष्ट्रिय परिचयपत्र बनाउन र भत्ता नवीकरण गर्न सकिने हुँदा लाभग्राहीहरूलाई ठूलो राहत मिलेको बताउनुभयो । शिविरमा जिल्ला प्रशासन कार्यालयका कर्मचारीहरु, गाउँपालिकाका कर्मचारीहरू, वडा अध्यक्ष र वडाका कर्मचारीहरुको उपस्थिति थियो ।
