काभ्रे,
स्व.उर्मिला सापकोटा स्मृति डाँडापारी पत्रकारिता पुरस्कारद्वारा रेडियोकर्मी दिलकुमारी हुमागाईं (शोभा) पुरस्कृत हुनुभएको छ । आज बनेपामा नेपाली काँग्रेसका केन्द्रीय सदस्य शिव प्रसाद हुमागाईंको प्रमुख आतिथ्यतामा आयोजित १४ औं स्मृति सभा कार्यक्रम मार्फत हुमागाईंलाई पुरस्कार वितरण गरिएको हो । पुरस्कार राशी ५ हजार ५ सय ५५ रूपैयाँ राशीको रहेको छ । उर्मिलाको निधन भएकै दिन प्रत्येक बर्ष यो पत्रकारिता पुरस्कार वितरण गरिदैँ आएको छ ।
पत्रकार हुमागाईं बिगत लामो समय रेडियो रोशीमा आबद्ध हुनुहुन्थ्यो । रेडियोकर्मी दिलकुमारी हुमागाईं (शोभा) ले जिल्लाको बिकट क्षेत्र डाँडापारी भेगका महिलाहरुको हकहितका बारेमा, बालबालिका, सुत्केरी महिलाहरुका समस्याहरु, अपाङ्गता भएकाहरुकको समस्याहरु, स्वास्थ्य, शिक्षा लगायत डाँडापारी भेगमा रहेका समस्या तथा चुनौतिहरुलाई समेटेर श्रब्य तथा छापा वा अनलाईनमा समाचारहरु प्रशारण एवं प्रकाशन गर्नुभएको थियो ।
अध्ययनका लागि ललितपुर जाने क्रममा उर्मिलाको निधन भएको थियो । उर्मिलाको २०६७ सालमा मृत्यु भएपछि बुबा गोपाल कृष्ण सापकोटाले छोरीको स्मृतिमा पुरस्कार स्थापना गर्नु भएको थियो । पुरस्कारको संरक्षक सापकोटाले छोरीको स्मृतिमा १ लाखको अक्षय कोष स्थापना गर्नु भएको थियो । डाँडापारी क्षेत्रको कथा र ब्यथालाई अझै बढी उजागर गर्न आवश्यक रहेको सापकोटाले बताउनुभयो ।
कार्यक्रममा प्रेस युनियनका केन्द्रीय अध्यक्ष शिव लम्साल, नेपाली काँग्रेस जिल्ला कार्य समितिका कार्यवाहक सभापति ठाकुरी न्यौपाने, उपसभापति रमेश हुमागाईं, सचिब माधव ढकाल, कोषाध्यक्ष जगन्नाथ गिरी, उपसभापति का क्षेत्र नम्बर १ का सभापति दिनेश लामा, युनियनका पूर्व केन्द्रीय उपाध्यक्ष ईश्वरी ओझा, बेथानचोक गाउँपालिका अध्यक्ष भगवान अधिकारी लगायत आ आफ्नो धारणा राख्नु भएको थियो ।
प्रेस युनियन काभ्रेका अध्यक्ष नगेन्द्र अधिकारीको अध्यक्षता भएको कार्यक्रममा प्रेस युनियनका केन्द्रीय सदस्य नारायण सापकोटा, कपिल कोईराला, प्रेस युनियन बागमति प्रदेशका लेखा शाखा संयोजक शंकर अधिकारी, पत्रकार महासंघ काभ्रेका अध्यक्ष बद्रीराज तिमल्सिना, पूर्व अध्यक्ष महेश पौडेल, प्रेस चौतारी काभ्रेका अध्यक्ष भुवन रायमाझी, प्रेस सेन्टर काभ्रेका अध्यक्ष रोजन तामाङ, समाजवादी प्रेस संगठन काभ्रेका अध्यक्ष सन्तोष चौलागाईं, फोनिज काभ्रेका अध्यक्ष इन्द्र बहादुर थापा, सञ्चारिका समूह काभ्रेका अध्यक्ष सुनिता सापकोटा लगायतले आ–आफ्नो भनाई राखेका थिए ।
