काभ्रे,
आज चैत्र १९ गते देशभर एकैसाथ माध्यमिक शिक्षा परीक्षा (एसईई) सुरु भएको छ । परीक्षा बिहान ८ बजेदेखि ११ बजेसम्म चल्नेछ । आज परीक्षाको पहिलो दिन अनिवार्य अङ्ग्रेजी विषयको परीक्षा सञ्चालन भइरहेको छ । परीक्षा नियन्त्रण कार्यालय कक्षा १० का अनुसार यसवर्ष देशभर बाट ५ लाख १२ हजार ४२१ विद्यार्थी परीक्षामा सहभागी छन् ।
काभ्रे जिल्लामा भने यसबर्षको परीक्षामा ३३ वटा परीक्षा केन्द्रबाट ६ हजार २ सय ८ जना विद्यार्थीले परीक्षा दिदै छन । शिक्षा विकास तथा समन्वय इकाई काभ्रेपलाञ्चोकका अनुसार ६९ वटा संस्थागत र १५० वटा सामुदायिक विद्यालय गरि २१९ विद्यालयका छात्रछात्राहरू परिक्षामा सहभागी भएका छन् ।
परिक्षामा सामुदायिक विद्यालयहरूबाट २ हजार ८० जना छात्रा र एक हजार ७ सय १७ जना छात्र गरि ३ हजार ७ सय ९७ जना र संस्थागत विद्यालयबाट १ हजार ८ जना छात्रा र एक हजार ४ सय ३ जना छात्र गरि २ हजार ४ सय ११ जना विद्यार्थीले एसईई परीक्षा दिदै छन् ।
यस वर्ष परीक्षालाई थप पारदर्शी र व्यवस्थित बनाइने भएको छ । शिक्षा, विज्ञान तथा प्रविधि मन्त्रालयले माध्यमिक शिक्षा परीक्षा (एसईई) को नतिजा एक महिनाभित्र सार्वजनिक गर्न राष्ट्रिय परीक्षा बोर्डलाई निर्देशन दिएको छ। शिक्षामन्त्री सस्मित पोखरेलले विद्यार्थीलाई लामो समयसम्म प्रतीक्षा गराउँदा मानसिक तनाव बढ्ने भएकाले छिटो नतिजा सार्वजनिक गर्न लागिएको बताउनुभयो ।
निर्देशनअनुसार बोर्डले यस वर्ष परीक्षा केन्द्रबाटै उत्तरपुस्तिका परीक्षण गर्ने निर्णय गर्दै नतिजा प्रकाशन प्रक्रिया छिटो बनाउने तयारी गरेको छ। विगतका वर्षहरूमा एसईईको नतिजा असार दोस्रो सातासम्ममा सार्वजनिक हुने गरेको थियो ।
