काभ्रे,रेडियो रोशी,
रोशी गाउँपालिका वडा नं. ५ मा निर्माणाधीन सडक आयोजनाहरूको अनुगमन गरिएको छ । आज गाउँपालिका उपाध्यक्ष तथा अनुगमन समिति संयोजक मिम बहादुर वाईबा (ज्वाला) को नेतृत्वमा चौकिडाँडा–पोडादोभान–फलामेसाँघु र पोडादोभान–लुर्पुङ दोकर्पा सडकको अनुगमन गरिएको हो ।
चौकिडाँडा–पोडादोभान–फलामेसाँघु सडक गाउँपालिका र संघीय सरकारको समपूरक योजना अन्तर्गत निर्माण भइरहेको छ। हाल यस खण्डमा कालोपत्रे (पिच) का लागि ‘बेस’ बिछ्याउने कार्य धमाधम भइरहेको गाउँपालिका उपाध्यक्ष तथा अनुगमन समिति संयोजक मिम बहादुर वाईबा (ज्वाला) ले जानकारी दिनुभयो ।
यो सडकको निर्माण कार्य यसै आर्थिक वर्षभित्र सम्पन्न गर्ने लक्ष रहेको छ । अहिलेसम्मको कार्यप्रगति सन्तोसजनक रहेको पाईएको उहाँले बताउनुभयो । “विकास निर्माणलाई दिगो र मजबुत बनाउन प्राविधिक मापदण्ड अनुसार नै निर्माण कार्य भैरहेको छ, तोकिएको समयमै र उच्च गुणस्तरका साथ काम सक्न निर्देशन दिएको छु”– उहाँले भन्नुभयो ।
त्यसैगरी पोडादोभान–लुर्पुङ दोकर्पा सडक प्रदेश सरकार मार्फत जिल्ला पूर्वाधार कार्यालयको बहुवर्षीय योजना अन्तर्गत संचालित यस सडकमा हाल मेसिनरी ग्याबिन वाल र प्लम वाल लगाउने कार्य भइरहेको उहाँले जानकारी दिनुभयो ।
अनुगमनमा अनुगमन समितिका सदस्यहरू लाल कुमार पाख्रिन, रिता कोईराला, लक्ष्मी माया तामाङ र गाउँपालिकाको योजना शाखाका राम लामा लगायतको उपस्थिति रहेको थियो ।
