काभ्रे,
भुकम्प प्रभावितको उद्दार तथा राहतका लागि आन्तरिक रूपमै एक अर्बभन्दा धेरै सहयोग संकलन हुँने अनुमान गरीएको छ । आज साँझसम्म दर्जनौं राष्ट्रिय तथा अन्तर्राष्ट्रिय निकाय,सङ्घ–संस्था, निजी कम्पनी र व्यक्तिले सहयोग गर्ने प्रतिबद्धता व्यक्त गरेका छन् ।
यी हुन उद्दार तथा राहतका लागि सहयोग गर्ने सहयोगी दाताहरुः
भूकम्पपीडितलाई राहतका लागि नेपाल सरकारले १० करोड रूपैयाँ गरेको छ । चीन सरकारले १० करोड रूपैयाँ बराबरको सामग्री सहयोग गर्ने बताएको छ ।
बागमती र लुम्बिनी प्रदेश सरकारले डेढ करोड तथा गण्डकी, सुदुरपश्चिम र कोशी प्रदेश सरकारले एक÷एक करोड रुपैया सहयोग गर्ने घोषणा गरीसकेका छन् ।
यस्तै, पोखरा महानगरपालिकाले ५० लाख र तिलोत्तमा नगरपालिकाले १० लाख रुपैया सहयोग घोषणा गरेका छन् । डोटीको बोगटान फुड्सिल, डोल्पाको ठूलिभेरी, सिन्धुलीको घ्याङलेख, भोजपुरको पौवादुङ, सिन्धुुपलान्चोकका विभिन्न स्थानीय तहले पनि सहयोगको घोषणा गरेका छन् ।
भाटभटेनी सुपरमार्केटले १ करोड ११ लाख, बुद्ध एयरले १ करोड, कैलाश हेलिकप्टरले १० लाख र अर्ना बियरले २५ लाख रुपैयाँ सहयोग गर्ने भएका छन् । यस्तै एनआइसी एसिया बैङ्कले ५१ लाख, सिटिजन्स बैङ्कले २५ लाख सहयोग गर्ने घोषणा गरेका छन् । विनोद चौधरी फाउन्डेसनको तर्फबाट विभिन्न राहत सामग्री पठाउने जनाएको छ ।
नेकपा एमालेले १ करोड, नेपाली काँग्रेस र नेकपा माओवादी केन्द्रले ५०÷५० लाख, सहयोग गर्ने भएका छन् । त्यस्तै, नेपाली काँग्रेसको भातृ सङ्गठन नेपाल विद्यार्थी सङ्घले ७ लाख सहयोग गर्ने भएको छ ।
त्यस्तै, नेपाल कम्युनिष्ट पार्टी एकीकृत समाजवादीले कोष स्थापना गर्ने जनाएको छ । एनआरएनएले १ करोड १० लाखको कोष स्थापना गर्ने भएको छ । एनआरएनए कै आरके शर्मा समूहले २१ लाख रुपैया सहयोग गर्ने जनाएको छ ।
एनआरएनएका पूर्वअध्यक्ष तथा ब्यवसायी जीवा लामिछाने आवद्ध होटल ट्रीप इन्न जर्मनीले २० लाख रुपैयाँ सहयोग गर्ने घोषणा गरेको छ भने अर्का पूर्वअध्यक्ष शेष घलेले पनि भूकम्प प्रभावितलाई सहयोग गर्ने घोषणा गर्नुभएको छ ।
नेपाल क्रिकेट सङ्घले आज भएको टी ट्वान्टी एसिया छनोट अन्तर्गतको फाइनल खेलको टिकटबाट उठेको रकमको ५० प्रतिशत रकम भूकम्प पीडितलाई सहयोग गर्ने घोषणा गरिसकेको छ ।
