काभ्रे,
बेथानचोक गाउँपालिकाको सार्वजनिक सुनुवाई सम्पन्न भएको छ । हिजो (सोमबार) गाउँपालिकाको आ.व २०७९÷०८० तथा २०८०÷०८१ को असोज मसान्त सम्मको सार्वजनिक सुनुवाई गाउँपालिकाको प्राङ्गणमा सम्पन्न भएको हो । सहभागिता, पारदर्शिता र जवाफदेहिताका लागि आयोजना गरिएको सार्वजनिक सुनुवाई कार्यक्रममा अध्यक्ष भगवान अधिकारीले सामुदायिक वनमा झाडी फडानी गरी फलफूलका विरुवा र जडिबुटि रोप्ने कार्यलाई अगाडि बढाइने जानकारी दिनुभयो ।
शिक्षा, स्वास्थ्य, रोजगार, पर्यटन, कृषि, युवा लक्षित कार्यक्रमलाई विशेष जोड दिदैं बेथानचोक गाउँपालिकालाई एग्रो टुरिजम हब बनाएरै छाड्ने लक्ष्य रहेको उल्लेख गर्नुभयो । दिगो विकास लक्ष्य प्राप्तिका लागि जनप्रतिनिधिहरु एकजुट भएर लागीपर्ने उहाँँको प्रतिवद्धता छ । विभिन्न चुनौतिका बाबजुद पालिकाको आफ्नै प्रशासकिय भवन बनाउँन प्रयासरत रहेको भन्दै उहाँले यसका लागि आम नागरिकको साथ र समर्थन आवश्यक रहेको बताउनुभयो ।
गाउँपालिकाका अध्यक्ष भगवान अधिकारीको सभाध्यक्षतामा सम्पन्न भएको कार्यक्रममा उपाध्यक्ष तारा राना तिमल्सिनाले स्वागत मन्तव्य सहित पालिकाको गतिविधिका बारेमा जानकारी दिनुभयो । प्रमुख प्रशासकिय अधिकृत टेक बहादुर बुढथापाले आ.व २०८०÷०८१ को कात्र्तिक २० गते सम्म १४ करोड ५४ लाख ३५ हजार ९ सय २१ बजेट निकासा भएकोमा १२ करोड ६९ लाख ३ सय ५५ रुपैंया खर्च भएको जानकारी दिनुभयो ।
विभिन्न शाखाहरुको प्रगति प्रतिवेदन प्रस्तुत गर्दै उहाँले स्थानिय तहले पाएको २२ वटा अधिकार अनुसार नै नागरिकको माग अनुसार काम गरिरहेको बताउनुभयो । पालिकाले सञ्चालन गरेको विकास निर्माणका कार्यक्रमहरु, सेवा सुविधा, पारदर्शिता, सुशासन र जनसरोकारका विषयहरु माथि उपस्थित गाउँपालिका वासीहरुले जनप्रतिनिधिहरुलाई खबरदारी गर्दै सल्लाह सुझाव सहितको आ आफ्नो भनाई राखेका थिए ।
सम्बन्धित शाखा प्रमुखहरुले नागरिकले उठाएका समस्या तथा खबरदारीलाई पालिकाले गरेका प्रयास र कार्यान्वयनका विषयमा स्पष्ट पारेका थिए । कार्यक्रममा ६ वटै वडाका वडाअध्यक्षहरु, कार्यपालिका सदस्यहरु, राजनैतिक दलका प्रमुख एवं प्रतिनिधिहरु , गाउँपालिकावासीहरु, पत्रकारहरु लगायत विभिन्न संघ संस्थाका प्रमुख एवं प्रतिनिधिहरुको उल्लेख्य सहभागिता रहेको थियो ।
