रेडियो रोशी÷काभ्रे,
तेमाल गाउँपालिकाले जनै पूर्णिमा पर्वको अवसरमा भोलि १३ गते देखि १५ गतेसम्म ३ दिन सार्वजनिक विदा दिने निर्णय गरेको छ । गाउँपालिकाको श्री सत्यनारायण मन्दिर परिसरमा जनै पूर्णिमाको दिन लाग्ने जात्रा र मेलालाई सभ्य र भव्य रुपमा मनाउन भाद्र १३ गते देखि १५ गते (३ दिन) सम्म गाउँपालिका अन्तर्गतका कार्यालयहरु, शैक्षिक संस्थाहरु, स्वास्थ्य संस्थाहरु तथा वडा कार्यालयहरु बन्द हुने भएका हुन् ।
गाउँपालिकाको केन्द्रमा अवस्थित श्री सत्यनारायण मन्दिर परिसरमा जनै पूर्णिमाको अवसरमा परापूर्वकाल देखि नै जनैपूर्णिमाको दिन धार्मिक जात्रा हुने गरेको छ । नारायणस्थान मन्दिरमा लाग्ने धार्मिक जात्रा र मेला तेमालको सांस्कृतिक तथा स्थानीय पर्व कै रुपमा विकसित भएको छ । जनैपूर्णिमाको दिन लाग्ने धार्मिक जात्रा एवं मेलामा तेमाल गाउँपालिका लगायत आसपासका नमोबुद्ध नगरपालिका, रोशी गाउँपालिका , माहाभारत गाउँपालिका लगायतका अन्य छिमेकी नगरपालिका तथा गाउँपालिकाबाट समेत दर्शनार्थी भक्तजनहरु उपस्थित भई अनुष्ठान गर्ने गरेका छन् ।
