रोशी सहकर्मी–माघ ९,
२०७६,काभ्रे/

अति सिमान्तकृत चेपाङ बालबालिका माध्यमिक शिक्षा कै लागि काभ्रेको कोसीपारि आएका छन । गाउँमा माध्यमिक तहको पढाई नहुने भएपछि चितवन जिल्लाको विकट कान्दाका ३१ चेपाङ बालबालिकाहरु पढाईको लागि काभे्रको कोशीपारीको चौरीदेउराली ४ स्थित धुसेनी शिवालयका आएका हुन । लक्ष्मी प्रतिष्ठानले उनीहरुलाई पढाउन सहयोग गर्दै आएको छ । निमा कुमार बलराम स्मृती छात्रावासमा बसेर अध्ययन गरिरहेका छन् । सवारी दुर्घटनामा आफ्ना दुई छोरा गुमाएपछिको पीडा भुल्न समाजसेवामा लाग्नुभएका विष्णु गौतमले श्रीमती लक्ष्मीको नाममा प्रतिष्ठान खोली कान्दामा समेत १ सय ७५ जनाको लागि छात्रावास निर्माण गर्नुभएको छ ।

माध्यमिक विद्यालयको स्वीकृती नभएपछि कान्दाको छात्रावासमा बस्ने बालबालिकाले लागि पढाई नै छोड्नुपर्ने बाध्यता भएपछि प्रतिष्ठानले काभ्रेमा पनि छात्रावास सञ्चालन गरेको हो । छात्राबासमा रहेका बालबालिका पनि पढ्न पाएकोमा खुशी छन् । कक्षा ९ मा अध्ययनरत मिसन प्रजा छात्रावासको व्यवस्था नभएको भए आफ्नो पढाई विचमा नै छुट्ने बताउँछन् । छात्रावास सञ्चालन गर्ने श्रोत जुटाउनको लागि १ हजार फलफुलका बिरुवा रोपिएको छ । सामाजिक सञ्जालमार्फत र व्यक्तिगत चिनजानको आधारमा पनि सहयोग संकलन गरिरहनुभएको छ । दाताहरुले केही विद्यार्थीको लागि बर्षभर लाग्ने खर्च व्यहोरेका छन् । २०७२ सालदेखि चेपाङ बालबालिकाहरु छात्रावासमा बस्दै आएका छन् ।

Facebook Comments Box