धुलिखेल–११ बाँनियाछापमा भिषण आगलागी , क्षतिको विवरण आउन बाँकी

काभ्रे,

धुलिखेल नगरपालिका वडा नम्बर ११ बाँनियाछापको एक घर आगलागी भएको छ । स्थानीय बलराम धिमालको ढुङगा माटो र जस्ताले छाएको घरमा आज बिहान अचानक आगलागी भएको हो । आगलागीबाट ढुङ्गा, माटो र जस्ताले छाएको ३ तल्ले घर र एउटा गाईबस्तु बाँध्ने गोठ पूर्णरुपमा जलेर नष्ट भएको छ ।
आगलागीको खबर प्राप्त हुनासाथ प्रहरी टोली घटनास्थलमा पुगेको थियो । धुलिखेल नगरपालिकाको दमकल र स्थानीयवासीको सहयोगमा आगो नियन्त्रणमा लिएको जिल्ला प्रहरी कार्यालय काभ्रेले जनाएको छ । आगलागीको कारण भने खुलेको छैन । आगलागीबाट अन्नपात र अन्य भौतिक बस्तु जलेर नष्ट भए पनि चौपाया र मानवीय क्षति नभएको प्रहरीले जनाएको छ । आगलागीबाट भएको क्षतिको विवरण आउन बाँकी छ ।