काभ्रे,
संविधानसभाका अध्यक्ष तथा नेकपा एमालेका उपाध्यक्ष सुवासचन्द्र नेम्वाङको पार्थिव शरीर आज दिनभर श्रद्धाञ्जलीका लागि पार्टी कार्यालयमा राखिने भएको छ । नेम्वाङलाई घरमै हृदयाघात भएपछि आज बिहान उपचारका लागि महाराजगञ्जस्थित त्रिवि शिक्षण अस्पतालमा पुर्याईएको थियो । शिक्षण अस्पतालका इमरजेन्सी विभागका प्रमुख डा रमेश महर्जनका अनुसार नेम्वाङलाई बिहान १ बजेर २० मिनेटमा अस्पताल ल्याइएको थियो । २ बजेर ३० मिनेटमा चिकित्सकले मृत घोषणा गरेका थिए ।नेकपा एमालेले बिहान ११ बजेका लागि सचिवालयको आकस्मिक बैठक बोलाएको छ । अन्तिम संस्कार भने परिवारको सल्लाह र समन्वयमा मात्रै गर्ने तयारी भएको एमाले पार्टी कार्यालय सचिव डा भिष्म अधिकारीले जानकारी दिनुभयो । प्रधानमन्त्री पुष्पकमल दाहाल ‘प्रचण्ड’, एमाले अध्यक्ष केपी शर्मा ओली, सभामुख देवराज घिमिरे, एकीकृत समाजवादी पार्टीका अध्यक्ष माधवकुमार नेपालसहित दलका शीर्ष, नेताकार्यकर्ताहरू बिहानै शिक्षण अस्पताल पुगेका थिए ।
यसैबिच, नेम्वाङको निधन भएपछि राष्ट्रपति रामचन्द्र पौडेल, प्रधानमन्त्री पुष्पकमल दाहाल , नेपाली काँग्रेसका सभापति शेरबहादुर देउवा तथा बिभिन्न पार्टिका नेता कार्यकर्ताहरुले समवेदना प्रकट गरेका छन् । राष्ट्रपति रामचन्द्र पौडेलले नेम्वाङको निधनको खबरले मर्माहत र स्तब्ध भएको बताउनु भएको छ ।सामाजिक सञ्जालमार्फत नेम्वाङप्रति श्रद्धाञ्जली व्यक्त गर्दै राष्ट्रपति पौडेलले लेख्नुभएको छ, ‘नेम्वाङ परिवार, गणतन्त्र पक्षधर तथा उहाँको पार्टीप्रति गहिरो समवेदना प्रकट गर्दछु ।’ प्रधानमन्त्री पुष्पकमल दाहाल ‘प्रचण्ड’ नेम्वाङको निधनले आफू मर्माहत भएको बताउनुभएको छ । ट्वीटमाप्र्त प्रधानमन्त्री प्रचण्डले यस्तो बताउनुभएको हो । नेपाली काँग्रेसका सभापति शेरबहादुर देउवाले पनि संविधानसभाध्यक्ष नेम्वाङको निधनको खबर मर्माहत बनाएको भन्दै श्रद्धाञ्जली व्यक्त गर्नुभएको छ ।
