भाद्र मसान्त भित्रमा सामाजिक सुरक्षा परिचयपत्र नवीकरण गर्न रोशीको अनुरोध

देबराज÷काभ्रे,

रोशी गाउँपालिकाले पालिकाभित्रबाट सामाजिक सुरक्षा भत्ता प्राप्त गर्ने लाभग्राहीहरुलाई भाद्र मसान्त भित्रमा सामाजिक सुरक्षा परिचयपत्र नवीकरण गर्न अनुरोध गरेको छ । गाउँपालिकाले गाउँपालिका भित्रकोे १२ वटै वडाका लाभग्राहीहरुले सम्बन्धित वडा कार्यालयमा आफु स्वयं उपस्थित भएर निवेदन दिई आर्थिक वर्ष २०८०÷०८१ को सामाजिक सुरक्षा भत्ताका लागि २०८० भाद्र मसान्त भित्रमा परिचयपत्र नविकरण गराउनु हुँन सूचित गराएको छ । आफै उपस्थित हुन नसक्ने व्यक्तिहरुको हकमा भने निजको आमा, बाबु संरक्षक, माथवर वा स्याहार सुसार गर्ने व्यक्तिले आवेदन दिन सक्नेछन् ।
दिईएको मिति भित्र नविकरण नभएका लाभग्राहीको नाम सामाजिक सुरक्षाको लाभग्राहीको सूचीबाट स्वतः लगत कट्टा हुने सुचनामा उल्लेख गरीएको छ । यदि स्वतः लगत कट्टा भएमा त्यस्ता लाभग्राहीले पुन सामाजिक सुरक्षा ऐन, २०७५ को दफा १२ बमोजिम नयाँ लाभग्राही सरह आवेदन दिनुपर्ने बताईएको छ ।
वडामा सामाजिक सुरक्षा परिचयपत्र नवीकरण गर्दा लाभग्राहीको फोटो र नागरिकताको स्क्यान कपि अनिवार्य रुपमा अपलोड गरी नागरिकता नं जारी मिति तीन पुस्ते विवरण र मोबाइल नं. (यदि नभएको अवस्थामा परिवारको अन्य वा वास्तविक संरक्षकको मोबाइल नं.) अनिवार्य रूपमा राख्नुपर्ने गाउँपालिकाद्धारा जारी गरीएको सुचनामा भनिएको छ ।

सामाजिक सुरक्षा परिचयपत्र नवीकरण गर्न आवश्यक कागजातहरूः
१.परिचय पत्र नवीकरणको निवेदन
२.पासपोर्ट साईजको फोटो १ प्रति
३.नागरिकताको प्रतिलिपि वा जन्मदर्ता प्रमाणपत्रको प्रतिलिपि
४.सामाजिक सुरक्षा परिचयपत्रको सक्कल प्रति
५.अपाङ्गता भएका लाभग्राहीको हकमा अपाङता परिचयपत्र
६.संरक्षकको नागरिकताको प्रतिलिपि