काभ्रे,
हालसम्म देशभर २५ प्रतिशत मात्र रोपाइँ सकिएको कृषि तथा पशुपन्छी विकास मन्त्रालयले जनाएको छ । आकाशे पानी समयमा नपरेका कारण देशभर रोपाइँ प्रभावित हुँदा धान उत्पादन घट्ने अनुमान गरिएको छ । गत वर्ष यो अवधिमा झण्डै ५० प्रतिशत रोपाइँ सकिएकामा यस वर्ष आधा मात्रै रोपाइँ भएको मन्त्रालयको भनाइ छ । अर्को तर्फ भने धानको ब्याडमा र खेतमा झारले दुःख दिएको किसान बताउँछन् । धानको ब्याडमा बीउभन्दा बढी झार उम्रने र धान खेतमा पछिल्लो केही वर्ष यता नयाँ नयाँ झार देखा पर्दा उत्पादनमा ह्राससँगै खर्च पनि बढेको किसानहरूको भनाई छ ।
समयमा झार नहटाए ६० प्रतिशतभन्दा धेरै उत्पादन घट्ने कृषि विज्ञ बताउँछन् । कृषि विज्ञ डा. टिका कार्कीले धान रोप्नुअघि राम्ररी हिल्याउने र धान रोपिसकेपछि कम्तीमा १० दिन निरन्तर पानी राखे झार कम आउने बताउनुभयो । धानको बीउमा झारको दाना पनि मिसिएर आउने भएकाले शुद्ध प्रमाणित बीउ मात्र ब्याडमा छर्ने, धान रोप्दा बीउबाट झार छुट्याउने, जमिनको खनजोत राम्रोसँग गर्ने जस्ता तरिकाले पनि झारको सङ्क्रमण कम गर्न सकिने धान बाली विज्ञहरू बताउँछन् ।
