काभ्रे,
काभ्रेपलाञ्चोक जिल्लाको नमोबुद्ध नगरपालिका–४ स्थित मेथिनकोट अस्पतालमा सेवाहरु थप भएसँगै बिरामीहरुको चाप उच्च हुँन थालेको छ । विपी राजमार्गको छेउमा रहेको जिल्लाको ग्रामीण भेगका नागरिकले सेवा प्राप्त गर्ने एकमात्र सरकारी अस्पताल मेथिनकोट अस्पतालले नागरिकहरुलाई गुणस्तरिय सेवा दिँदै आएको छ । अस्पतालले गुणस्तरीय सेवामा छलाङ्ग मारेको छ । अस्पतालका निमित्त सुपरिडेन्टेट डा. मधुकर दाहालले अस्पतालमा वायोस्पी बाहेकका सम्पुर्ण रोगको परिक्षण गरिने र गुणस्तरीय ल्याब रहेको अस्पताल १५ बेड बाट ५० वेडमा स्तरोन्नती गरेको, सेवामा ११ जना मेडिकल अफिसर सहित ६३ जनाको जनशक्ति रहेको, ३ वटा ईमरजेन्जी बेड भएको छिट्टै २ वटा थप गर्ने, आईसियु बेड १ वटा रहेको, अस्पतालमा हृदयघातका बिरामीका लागी पहिलो चरणको खोप निशुल्क उपलब्ध रहेको जानकारी दिनुभएको छ । त्यसैगरी, मानसिक रोगको उपचार, डाईलोसिस सेवा, हार्डजोर्नि, बाल विशेषज्ञ, सम्पुर्ण ल्याबको सेवा, रेविज खोप लगायतका थुप्रै सेवाहरु उपलब्ध रहेको र नेपाल सरकारले तोकेको २ सय ५० थरिका औषधिहरु निःशुल्क रुपमा उपलब्ध रहेको दाहालले जानकारी दिनुभयो ।
त्यसैगरी अस्पतालमा वि ग्रेडको एम्बुलेन्स सेवा, द्वन्द्वका समयमा घाईतेहरुको निःशुल्क उपचार, रक्त सञ्चार सेवा उपलब्ध रहेको बताउदै डा. दाहालले अस्पतालमा फिजियोथेरापी सेवा र भवनको आवश्यकता रहेको बताउनु भयो । अस्पतालममा छिट्टै ओटिका सेवा शुरु गरिने दाहालले बताउनु भयो । अस्पतालबाट सर्वसाधारणले सहज रुपमा सेवा पाउनका लागी अस्पतालको ब्यबस्थापन पक्ष निरन्तर रुपमा लागी रहेको दाहालले बताउनु भयो । अस्पतालका ब्यबस्थापन समितिका अध्यक्ष कृष्ण प्रसाद खनालले बागमती प्रदेशलले ५० वेडमा अपग्रेड गरे पश्चात सर्वसाधारणलाई सहज भएको बताउनु भयो । २०५४ मा प्राथमिक स्वास्थ्य केन्द्रका रूपमा स्थापना भएर २०६६ मा १५ शय्याको जिल्ला अस्पतालका रूपमा स्तरोन्नति गरिएको थियो। विसं २०७७ मा सङ्घीय सरकारले ५० शय्याको अस्पतालमा रुपान्तरण गरेर प्रादेशिक जिल्ला अस्पतालका रूपमा सेवा प्रवाह गर्दै आएको छ।
