काभ्रे,
काभ्रे जिल्लाको तत्कालिन शिखर आम्बोटे गाविस–३, मा जन्मिनु भएका इन्द्र सिंह लामाले पहिलो पटक तामाङ समुदायबाट राष्ट्रिय अनुसन्धान विभागको डिआईजी पदमा बढुवा हुनुभएको छ । मन्त्रिपरिषद्को मंगलबार बसेको बैठकले एसएसपी लामा र माधव तिमल्सिनालाई डिआईजीमा बढुवा गरेको हो । प्रारम्भिक शिक्षा श्रीदेवी निम्न माध्यामिक विद्यालय शिखर आम्बोटेबाट पुरा गर्नुभएका लामाले सञ्जीवनी मावि धुलिखेलबाट २०४६ सालमा एसएलसी उतिर्ण गर्नु भएको थियो भने शंकरदेव क्याम्पसबाट स्नातक, त्रिचन्द्र कलेजबाट एम–ए र नेपाल ल क्याम्सबाट एलएलबी उत्तिर्ण गर्नुभएको छ ।
लामाले २२ वर्षको उमेरमा प्रहरी निरीक्षकबाट जागिरे जीवन प्रारम्भ गर्नुभएको थियो । २०५३ साल पुस ५ गतेबाट सेवा सुरु गर्नुभएका लामाले २०५५ देखि २०५६ सालसम्म राष्ट्रिय अनुसन्धान जिल्ला कार्यालय सिन्धुपाल्चोकको प्रमुख र २०५६ देखि २०५९ सालसम्म राष्ट्रिय अनुसन्धान जिल्ला कार्यालय रसुवाको प्रमुख भएर काम गर्नुभएको थियो । २०५९ देखि २०६४ सालसम्म राष्ट्रिय अनुसन्धान विभागमा विभिन्न जिम्मेवारी सम्हाल्दै गर्दा २०६४ सालको बैशाख महिनामा लामा डिएसपीमा बढुवा हुनुभएको थियो । डिएसपी भएपछि लामाले पर्सा, सिन्धुपाल्चोक र राष्ट्रिय अनुसन्धान विभागमा काम गर्नुभएको थियो ।
२०७१ सालदेखि उप अनुसन्धान निर्देशक (एसपी) को जिम्मेवारीमा रहुनुभएका लामाले सिरहा, मोरङ र काठमाण्डौको जिल्ला प्रमुख रुपमा काम गर्नुभएको थियो । २०७५ सालदेखि तीन वर्ष सह अनुसन्धान निर्देशक (एसएसपी) लामा नयाँ दिल्ली स्थित नेपाली राजदुताबासमा काउन्सेलरको कार्यरत हुनुहुन्थ्यो । लामाले २०७८ पुसदेखि हाल सालसम्म राष्ट्रिय अनुसन्धान जिल्ला कार्यालय ललितपुरको जिल्ला प्रमुख भएर काम गरेको अनुभव समेत प्राप्त गर्नुभएको छ।
