काभ्रे,
रोशी गाउँपालिकामा “लैंगिक हिंसा तथा चेलिबेटी बेचविखन विरुद्धमा बालक्लवको भूमिका” विषयमा भएको वक्तृत्वकला प्रतियोगितामा पोक्रा माध्यमिक विद्यालयका छात्र भानुभक्त विश्वकर्मा प्रथम हुनुभएको छ । रोशी गाउँपालिकाभित्रको सहभागि १५ वटा माध्यमिक विद्यालयको प्रतियोगिलाई पछि पार्दै पोक्रा मा.वि ले प्रथम स्थान हातपार्न सफल भएको हो । त्यसैगरि द्धितिय स्थान हिमालय माध्यमिक विद्यालयका छात्रा सवितामायाँ तामाङ एवं तेस्रो स्थानमा विन्ध्यवासिनी माध्यमिक विद्यालयका छात्रा विनिता वि.क. र लक्ष्मीनारायण माध्यमिक विद्यालयका छात्रा विपिका थापाले हात पार्नुभएको छ । सान्त्वना पुरस्कार भने हरिसिद्धि माध्यमिक विद्यालयको छात्रा मनिता तामाङले प्राप्त गर्नुभएको छ । प्रथम पुरस्कार रु १५ हजार, दृतिय पुरस्कार रु १० हजार तृतीय पुरस्कार रु ७ हजार र सान्वना रु ५ हजार सहित सम्मानपत्रद्वारा सम्मान गरिएको छ । गाउँपालिकाको सहयोगमा माइती नेपालको समन्वय तथा हेल्दी नेपालको आयोजनामा उक्त कार्यक्रम भएको हो । कार्यक्रममा निणार्यकको भूमिकामा भने माइती नेपालको कार्यकारी निर्देशक विश्वराम खड्का, रोशीको शिक्षाको स्रोत व्यक्ति भिम प्रसाद भट्टराई र महिला बालबालिका शाखाको प्रमुख प्रज्वला राईले महत्वपूर्ण भूमिका निर्वाह गरेको हेल्दी नेपालको सचिव सुनिता तामाङले जानकारी दिनुभयो ।
कार्यक्रमको अवसरमा गाउँपालिका अध्यक्ष दिनेश लामाले लैंगिक हिंसा विरुद्धको १६ दिने अभियान कार्यक्रम २०७९ को स्मरण गर्दै धुलिखेलमा भएको कार्यक्रममा माइती नेपालको अध्यक्ष अनुराधा कोइरालाद्धारा उक्त कार्यक्रमको अवसरमा काभ्रे जिल्लाको १३ वटा पालिकाहरुमध्ये रोशी गाउँपालिकामा सबैभन्दा बढि लैंगिक हिंसाको घटना भएको तथ्यांक सार्वजनिक भएपश्चात् माइती नेपालको तथ्यांकमा भएको कुरालाई सम्बोधन गर्दै रोशी गाउँपालिकाले हेल्दी नेपाल र माईती नेपालसँग सहकार्य गरेर सडक नाटक, वक्तृत्वकला प्रतियोगिता तथा अभिमुखिकरण कार्यक्रममार्फत रोशीको महिला, जनप्रतिनिधि, विद्यालय, शिक्षक तथा विद्यार्थी मार्फत हिंसा रोकथाम तथा न्यूनिकरणका कार्यक्रमहरु सञ्चालन भएको बताउनुभयो । कार्यक्रममा रोशी गाउँपालिका प्रवक्ता वसन्त कुमार तामाङ, वडा नम्बर ११ को वडा अध्यक्ष लालकुमार पाख्रिन, हेल्दी नेपालका अध्यक्ष शान्ति लक्ष्मी श्रेष्ठ, रोशी माध्यमिक विद्यालयका प्रधानाध्यापक विन्दुप्रसाद ढुंगाना एवं १५ वटै विद्यालका प्रधानाध्यापक तथा प्रतिनिधि शिक्षकहरुको उपस्थिति रहेको सचिव सुनिता तामाङले जानकारी दिनुभयो ।
