काभ्रे,
तेमाल गाउँपालिकाका स्वास्थ्यकर्मीहरुलाई DHIS2 सम्बन्धी ३ दिने तालिम सुरु भएको छ । गाउँपालिकाले गाउँपालिका भित्रका ९ वटा वडका स्वास्थ्यकर्मीहरुलाई DHIS2 सम्बन्धी ३ दिने तालिम आजबाट भकुण्डेबेसीमा सुरु गरेको हो । तेमाल गाउँपालिकाको आयोजनामा सञ्चालन भएको यस तालिममा स्वास्थ्यकर्मीहरुले मासिक रुपमा भर्ने फर्मलाई अब प्रविधिको प्रयोग गरेर डिजिटलका माध्यमबाट भर्न सिकाइने तेमाल गाउँपालिका स्वास्थ्य शाखा प्रमुख शिवहरी पाठकले जानकारी दिनुभयो । कार्यक्रमको उद्घाटन सत्रमा बोल्नुहुँदै तेमाल गाउँपालिकाका उपप्रमुख दलमान थोकर डिएमले तेमालका नागरिक तथा जेष्ठ नागरिकको साहारा नै गाउँपालिका रहेको बताउनुभयो । केही समय अगाडी मात्र तेमालका गाउँपालिकाले ४० वर्ष माथीका २८१८ जना व्यक्तिको नसर्ने रोगको स्वास्थ्य परिक्षण गरेकोमा ६ सय २५ जनालाई उच्च रक्तचाप र मधुमेह रोग देखा परेको र ३६५ जनालाई निःशुल्क औषधी वितरण गरेको बताउनु भयो । स्वास्थ्य क्षेत्रको कामलाई प्रभावकारी रुपमा अभिलेखको लागी यो तालिम महत्वपुर्ण रहेको बताउनु भयो ।
कार्यक्रमको विशेष अतिथि स्वास्थ्य कार्यालय काभ्रेका प्रमुख पुरुषोत्तम राज सेँढाईले तेमाल गाउँपालिकाले स्वास्थ्य क्षेत्रमा गर्दै आएको काम निकै प्रशंसनिय रहेको बताउनुभयो । त्यस्तै स्वास्थ्यकर्मीहरुले बिरामीसँग गर्ने व्यवहार देख्दा आफुदलाई खुशी लागेको र आगामी दिनमा पनि अझ राम्रो देख्न पाउने आशा गर्नु भएको छ ।
उँहाले स्वास्थ्यकर्मीले काम सँगै रिर्पोटिङको काम लाई पनि जोड दिनुपर्ने बताउनु भयो । यो तालिमले डिजिटल रिर्पोटिङ गर्न सक्षम बनाउने कुरामा आफु ढुक्क रहेको बताउनु भयो। तालिम यही जेस्ठ ३२ गते सकिने स्वास्थ्य शाखा प्रमुख शिवहरी पाठकले जानकारी दिनुभयो।
