काभ्रे,
कार्तिक पूर्णिमाका दिन लाग्ने बौद्ध धर्मवलम्बीहरुको पवित्र धार्मिक तीर्थस्थल नमोबुद्धमा मेला शुरु भएको छ । आज बिहानैदेखी मेला भर्न जाने बौद्ध धर्मवलम्बी तामाङ र नेवार समुदायका मानिसहरुको घुइँचो लागेको छ । मेला पूर्णिमाको अघिल्लो रातबाट शुरु भइ पूर्णिमाको भोली पल्टसम्म लाग्ने गरेको छ । मेलामा दर्शनार्थीहरु जम्मा भई शान्तिको लागि लाखौँ दीप प्रज्वलन गर्ने गरीएको छ ।
जिल्लाको तत्कालिन शारदा वतासे गाविसस्थित इटेका महाराजा महादीपका ३ छोरा महासत्व, प्रभासत्व र वोधिसत्व शिकार खेल्ने क्रममा नमोवुद्ध भन्ने ठाउँमा जाँदा त्यहाँ प्रश्रव वेदनाले छटपटाएकी बघिनी र ५ डमरुको मरणासन्न अवस्थादेखि पछि राजकुमार महासत्वको मनमा दयाको भाव पलाई दाजुहरुसँग बघिनीलाई बचाउन सक्ने उपाय सोधेपछि उनले बघिनीलाई बचाउनको लागि आफ्नो शरीर दान गरेका थिए भन्ने धार्मिक कथन रहेको छ ।
आफ्नो छोराको अस्तुमात्र राजा महादीपले नमोवुद्धमा पाएपछि छोराको अस्तु राखेर उक्त स्थानमा राजाले गुम्वा निर्माण गरेका थिए । आफ्नो शरीर बघिनीको लागि दान गरेको २५ सय वर्ष पछाडी लुम्विनीमा तीनै राजकुमार महासत्वले मायादेवीको कोखबाट भगवान गौतम वुद्धको रुपमा जन्म लिएको र आफु जन्मेपछि वुद्धले नमोवुद्धमा आई त्यही अस्तु भएको ठाउँमा पुजा आजाका साथै साङगे लगाएको धार्मिक विश्वास रहँदै आएको छ ।
मेला भर्न आउने श्रद्धालुभक्तजनको सुविधाका लागि स्वयंसेवक, प्राथमिक उपचार, सुरक्षा, खानेपानी लगायतको व्यवस्था नगरपालिका सहितका विभिन्न संघसंस्था, क्लब र समितिहरुले गर्दै आइरहेका छन् । स्थानीय सरकार गठन भएपछि नमोबुद्ध जात्रालाई थप ब्यवस्थित बनाउन नमोबुद्ध नगरपालिकाले प्राथमिकतामा राख्दै आइरहेको छ ।
