काभ्रे,
नयाँ सदस्यता स्विकृतको माग गर्दै काभ्रे जिल्लाका कृयाशिल सञ्चारकर्मीले नेपाल पत्रकार महासंघ काभ्रे शाखालाई ज्ञापनपत्र बुझाएका छन् ।
जिल्लाका कृयाशिल सञ्चारकर्मीले नयाँ सदस्यता संघर्ष समिति, काभ्रेको तर्फबाट २० जनाको हस्ताक्षरमा हिजो महासंघ अध्यक्ष बद्रिराज तिमल्सिनालाई ज्ञापनपत्र बुझाएका हुन् । ज्ञापनपत्रमा नयाँ सदस्यताको सवाललाई महासंघले ध्यान नदिएको, वेवास्ता गरेको आरोप लगाइएको छ ।
१ बर्षअघि सदस्यता आव्हान गर्दा सबै प्रकृया पुरा गरेर आवेदन दिएका कृयाशिल सञ्चारकर्मीको हालसम्म पनि सदस्यता स्विकृत नभएको भन्दै पत्रकारहरुले शाखामार्फत प्रदेश र केन्द्रीय समितिको ध्यानाकर्षण गराएका हुन् ।
सञ्चारकर्मीहरुले नयाँ सदस्यताको टुंगो लगाएर मात्रै महासंघको साधारणसभा लगायत अन्य गतिविधि अघि बढाउन माग गर्दै उनीहरुले त्यसो नगरिए कार्यालयमा तालाबन्दी गर्नुका साथै साधारणसभा बिथोल्नेसम्मको चेतावनी समेत दिएका छन् । महासंघ अध्यक्ष बद्रिराज तिमल्सिनाले सदस्यता नपाएका कृयाशिल पत्रकारलाई कुनै विभेद नगरीको बताउँदै बैठक बस्न नसक्दा सदस्यताबारे निर्णय लिन नसकिएको बताउनुभएको छ ।
