काभ्रे,
काभ्रे जिल्लाको रोशी गाउँपालिका–४ महादेवटारका अग्नी पिडितलाई अत्यावस्यक राहत सामग्रीहरु वितरण गरीएको छ । गाउँपालिकाले बुधबार अग्नी पिडितलाई राहत सामग्रीहरु वितरण गरेको हो । बुधबार अग्नी पिडितलाई बागमती प्रदेश सांसद तथा पूर्वमन्त्री तिर्थ लामा, जिल्ला समन्वय समिति काभ्रेका उपप्रमुख रिमबहादुर तामाङ, गाउँपालिका अध्यक्ष दिनेश लामा, गाउँपालिका उपाध्यक्ष मिमबहादुर वाईबा, गाउँपालिकाका प्रमुख प्रशासकीय अधिकृत रामबहादुर तामाङ लगायतको उपस्तिथीमा गाउँपालिकाले राहत वितरण गरेको हो । प्रति घरपरिवार २ बोरा चामल, २ किलो दाल, ३ लिटर तेल, ५ प्याकेट नुन, प्रतिपरिवार एक वटा म्याट्रेस र प्रतिपरिवार त्रिपाल वितरण गरीएको छ ।
जिल्ला विपद व्यवस्थापन समितिले पनि राहत सामाग्री वितरण गरेको छ । नेपाल रेडक्रस सोसाइटी काभ्रे शाखाको व्यवस्थापनमा भाडाँकुडा, त्रिपाल, मण्डी लगायतका सामाग्री वितरण गरिएको हो ।
नेपाल रेडक्रस सोसाईटी र उद्योग वाणिज्य संघले गाउँपालिकाको सहकार्य पीडितलाई सहयोग पहिलो चरणको राहत उपलब्ध गराइएको छ । उद्योग वाणिज्य संघले पीडितलाई प्रतिपरिवार १ बोरा चालम, दाल १ किलो, खानेतेल १ लिटर, नुन १ किलोका दरले १५ घरधुरी परिवारलाई राहत उपलब्ध गराईएको हो । रेडक्रसले भाडाँकुडा, त्रिपाल, ओढ्ने ओछ्यान लगाएका सामग्री पीडितलाई उपलब्ध गराएको छ ।
गत मंगलबार रोशी ४ महादेवटार सामुदायिक जंगलको डढेलो सानोकोटा गाँउमा पस्दा १५ घर, १० वटा गोठ र ८ वटा चर्पी जलेर नष्ट भएका थिए । आगलागीबाट मानव र पशु चौपाया क्षति भने भएको छैन् । आगोलागीबाट प्रहरीको मुचुल्का अनुसार २ करोड भन्दा धेरैको आर्थिक क्षति भएको थियो ।
