काभ्रे,
चितवनको इच्छाकामना गाउँपालिकाले कार्यालयमा स्थानीय किसानको उत्पादन दही र मोहीलाई प्रोत्साहन गर्न ‘कोल्ड ड्रिंक्स’ निषेध गरेको छ । कार्यालयमा कोक ,फ्यान्टा, पेप्सी, स्प्राइट जस्ता ‘कोल्ड ड्रिंक्स’ निषेध गरेर किसानको उत्पादन दही र मोहीको प्रयोग गर्न सुरु गरएिको हो । स्वास्थ्यलाई असर गर्ने पेय पदार्थको खपत घटाउन तथा स्थानीय किसानको उत्पादनलाई प्रोत्साहन गर्न यस्तो निर्णय गरिएको गाउँपालिकाले जनाएको छ । गाउँपालिकामा हुने विभिन्न कार्यक्रममा तथा गाउँपालिका कार्यालयमा आउने अतिथिलाई गर्मी याममा दही र मोहीले स्वागत गरिने इच्छाकामना गाउँपालिकाका अध्यक्ष दानबहादुर गुरुङले बताउनुभयो ।
अहिले कार्यक्रम हुँदा गाउँपालिकामा दैनिक १० लिटरसम्म मोही प्रयोग हुने गरेको अध्यक्ष गुरुङले बताउनुभयो । गाउँपालिकाको पहिलो कार्यपालिका बैठकले नै निर्णय गरेर पालिका कार्यालयमा चिसो पेय पदार्थ निषेध गरेको हो । गाउँपालिकाले जाडो मौसममा भने चियाको प्रयोग गर्ने जनाएको छ । गाउँपालिकाभरिका वडा कार्यालयमा पनि यसै अनुसारको सर्कुलर गर्ने तयारी गरेको जानकारी दिनुभयो ।
