काभ्रे,
काभ्रे र भक्तपुरका समाजसेवी युवाहरुले संखुवासभाका विद्यार्थीलाई सहयोग सामाग्री हस्तान्तरण गरेका छन् । समाजसेवी युवाहरुको प्रयासमा संखुवासभा जिल्लाको खादबारी नगरपालिका वडा नं ३ मा रहेको लक्ष्मी आधारभूत विद्यालयका विद्यार्थीलाई शैक्षिक, ट्राकसुट तथा खेलकुदका सामाग्री हस्तान्तरण गरीएको हो । भक्तपुरका रोशन केसी, नमोबुद्ध नगरपालिकाका परीक्षण हुँमागाई, बेथानचोक गाउँपालिकाका सुरज श्रेष्ठको अगुवाईमा संखुवासभाका जिल्लाको खादबारी नगरपालिका वडा नं ३ मा रहेको लक्ष्मी आधारभूत विद्यालयका विद्यार्थीलाई शैक्षिक सामाग्री हस्तान्तरण गरेका हुन् । खादबारीका शुसिलजङ्ग कार्की र शिक्षक वेदराज घिमिरेले समन्वय गरेपछि सो स्थानमा पुगेर शैक्षिक सामाग्री हस्तान्तरण संम्भव भएको हो ।
विद्यार्थीका लागि आवश्यक शैक्षिक सामाग्रीको जोहो गर्न सहयोग भने लायन्स क्लब अफ काठमाडौं(इन्द्रेश्वर ३२५ आई नेपाल) का अध्यक्ष रामप्रसाद ढकाल (आरडी), भकुण्डेका युवा व्यवसायी समाजसेवी विकास खनाल, पाँचखाल खाँवाका महिला उद्यमी मनिषा श्रेष्ठ र रश्मी रंजितकारले सहयोग गरेका हुन् ।
सो कार्यमा काठमाडौंका लक्ष्मी श्रेष्ठ, अस्मिना गिरी, सन्तोषी दीक्षित खनालले भुमिका निर्वाह गरेका थिए । स्वास्थ्यकर्मी सुरक्षा श्रेष्ठ, संचारकर्मी मणिराम दाहाल र अरबिन्द्र गौतमसँगै कुक प्रशिक्षक मोहन गजुरेल, भुम्लु गाउँपालिकाको पूर्व उपाध्यक्ष कल्पना कुमारी श्रेष्ठ, आर्शु स्मृति प्रतिष्ठानका रुपेश काफ्ले, बर्दी तिमल्सिना, नेपाली कांग्रेसका नेता सुधिर वैद्य र संगम थापाले सहयोग गरेका थिए ।
विद्यालयमा अध्ययरत कूल ३७६ विद्यार्थीलाई नै स्टेशनरी हस्तान्तरण गरिएको थियो । कक्षा ६ देखि ८ सम्मका१४० जना विद्यार्थीलाई ट्राकसुट हस्तान्तरण गरिएको थियो । विद्यालयका लागि आवश्यक रहेको फलामको पिङसँगै कम्युटर तीन वटा सेट, क्यामरबोर्ड तीन सेट, बल नेट व्याटमिन्टन, सानो कक्षाका लागि सम्पुर्ण बिषय भएको पढ्ने चार्ट हस्तान्तरण गरेको परिक्षण हुमागाईले जानकारी दिनुभयो । विद्यालयमा अत्यावश्यक औषधि र तत्कालका लागि खाजा र बिस्कुटको समेत व्यवस्थापन गरिएको थियो । युवाहरुको समुहले पाँच लाख रुपियाँभन्दा धेरै खर्च गरेर शैक्षिक सामाग्री हस्तान्तरण गरेका हुन् ।
विद्यालयको शैक्षिक स्तर उकास्न सहयोग हुने प्रधानाध्यापक युवराज खत्रीले उल्लेख गर्नुभयो । उँहाले कक्षा ८ सम्म अध्ययन हुने सो विद्यालयमा आवश्यक परेको सहयोग आगामी दिनमा समेत सहयोग हुने आशा व्यक्त गर्नुभयो । शैक्षिक सामाग्री हस्तान्तरण कार्यक्रममा बोल्दै नगरपालिकाको उपाध्यक्ष महेश्वरा बज्रचार्यले आफ्नो स्थानीय तहमा शैक्षिक अवस्था सुधार्न युवाहरुले गरेको सहयोग निक्कै प्रशंसनीय रहेको बताउनुभयो । यसअघि पनि युवाको टोलीले विविध सामाजिक कार्यहरु गर्दै आएका छन् ।
