काभ्रे,
नेकपा माओवादी केन्द्रका पोलिटब्युरो सदस्य एवं लोकतान्त्रिक बाम गठबन्धनका काभ्रे क्षेत्र नम्बर १ का साझा उम्मेदवार सुर्यमान दोङ लालध्वजले प्रतिस्पर्धी उम्मेदवार र एमाले नेता कार्यकर्ताहरुले आफुविरुद्ध तल्लो स्तरमा झरेर गाली गलौजमा उत्रिएको बताउनुभएको छ । चुनावी अभियानको क्रममा तेमाल गाउँपालिका वडा नम्बर २ मा सम्बोधन गर्दै उँहाले यस्तो बताउनुभएको हो । उँहाले आफू जनताको साझा उम्मेदवार भएको बताउनुभएको छ । चुनावी अभियानका क्रममा जनताको अपार माया पाएको औल्याउँदै उँहाले भन्नुभयो ‘म जनताको साझा उम्मेदवार हुँ, जनताको समस्या उठाउने र त्यसको समाधान गर्ने मुल जिम्मेवारी मेरो र हाम्रो गठबन्धनको हुनेछ ।’
उँहाले जनताको विकास निर्माण र समस्या समाधानका लागि प्रतिपक्षीले उठाएको फाइल पनि आफूले बोक्ने उनको भनाई थियो । ‘जसरी भए पनि जनताको काम हुनुपर्ने हो, जनताको समस्या समाधान हुनुपर्ने हो यदि जनताको समस्या समाधान गर्ने कुनै पनि फाइल प्रतिपक्षीको हातमा छ भने त्यसलाई बोकेर सम्बन्धित कार्यालयमा लैजाने काम पनि मेरो हो, म लैजान्छु, हाम्रो गठबन्धनले लैजान्छ’ उँहाले भन्नुभयो । प्रतिस्पर्धी उम्मेदवार र एमाले नेता कार्यकर्ताहरुले आफुविरुद्ध तल्लो स्तरमा झरेर गाली गलौजमा उत्रिएको विषय आफू थाहा पाएको बताउँदै , ‘तपाईहरु संयमित भएर चुनावी अभियानमा लाग्नुहोला, जसको चेतना जति छ, उति नै बोल्ने हो ।’ भन्नुभयो । उँहाले भने हाम्रो जित सुनिश्चित छ मात्रै कति अन्तरले जित्ने भन्ने मात्रै हो तर प्रतिस्पर्धी उम्मेदवारको हार निश्चित भएपछि अराजक भाषण दिदै हिडेको बताउनुभयो ।
