चैत्र ३,
२०७७,सिन्धुली/
सिन्धुलीको कमलामाइ नगरपालिका–७ करङडाँडामा जिप दुर्घटना हुँदा ४ जनाको मृत्यु भएको छ । भने ७ जना घाइते भएका छन् । जिल्ला प्रहरी कार्यालय सिन्धुलीका डीएसपी मनोजकुमार लामाका अनुसार आज मंगलबार दिउँसो पौने ४ बजे कमलामाइ नगरपालिका–७ करङडाँडामा बा १७ च १११७ नम्बरको जिप सडकबाट ५० मिटर तल खस्दा ४ जनाको घटनास्थलमै मृत्यु भएको हो ।
मृत्यु हुनेमा कमलामाइ नगरपालिका बाँसकोटका ६०–६५ वर्षका रुद्रबहादुर थापा, १८ वर्षकी रीता इस्माली, १९ वर्षकी दुर्गा श्रेष्ठ र उनका छोरा २ वर्षका मनिष श्रेष्ठको मृत्यु भएको प्रहरीले बताएको छ । चालक भोजबिक्रम थापासहित सबै घाइतेलाई जिल्ला अस्पताल सिन्धुली लगिएको छ । चालकको अवस्था गम्भीर भएकाले धुलिखेल पठाउने तयारी भइरहेको डीएसपी लामाले जानकारी दिए ।
जिपमा ११ जना सवार थिए । सिन्धुली सदरमुकाम सिन्धुलीमाडीबाट बाँसकोटतर्फ जाँदै गरेको जिप आफैं अनियन्त्रित भएर पल्टिएको प्रारम्भिक अनुसन्धानबाट देखिएको लामाको भनाइ छ ।
