काभ्रे,
सरकारले भोलि संविधान दिवसको अवसरमा हरेक वर्ष दिदै आएको कैद मिनाहा माफी यस पटक भने नदिने भएको छ । कारागार व्यवस्थापन विभागले कैदी छुटेकाहरुको विवरण गृह मन्त्रालयमा पठाए पनि निर्णय हुन बाँकी रहेको भन्दै भोलि संविधान दिवसको अवसरमा कैदीबन्दी रिहा नहुने भएका हुन् । गृह मन्त्रालयले गृहकार्य नपुगेको भन्दै निर्णय नगरेकाले भोलि कैदीबन्दी छुट्ने अवस्था नरहेको कारागार व्यवस्थापन विभागका सूचना अधिकारी रामबहादुर सार्कीले बताउनुभयो । यसपटक कैद कट्टीबारे निर्णय नभएको कारागार व्यवस्थापन विभागका निर्देशक कमलप्रसाद पाण्डेले बताउनुभयो । उहाँले भन्नुभयोे, ‘पुनरावलोकन गरेर पुनः निर्णय हुन्छ ।’ गत असार ९ गते पनि ६२० जनाको कैद कट्टा गर्ने भन्दै सार्वजनिक सूचना निकालिएको थियो । त्यसको दुई महिनापछि फेरि भदौ १७ गते ४२० जनाको कैद कट्टा गर्ने भन्दै सूचना सार्वजनिक गरिएको थियो । दुबै टोलीमा सूचना निकालिएकाहरु असोज ३ गतेको संविधान दिवसको अवसरमा छुट्ने बताइएको थियो । तर, अहिले फेरि गृहकार्य गर्नुपर्ने भन्दै कैद मिनाहा माफी रोकिएको हो ।
