काभ्रे,
रोशी गाउँपालिकाका नागरिकको आँखा उपचारको लागि त्रिपक्षीय सम्झौता भएको छ । हिजो बनेपा–६ बुडोलमा रहेको रेयुकाई मासुनागा आँखा अस्पताल, रोशी गाँउपालिका र बनेपाको मनकामना हार्डवेयर सप्लायर्सबिच सम्झौता भएको हो ।
सम्झौता भएसँगै गाँउपालिका भित्र बसोबास गर्ने नागरिकहरुको निःशुल्क मोतिबिन्दु रोगको उपचार हुने भएको छ । त्रिपक्षीय सम्झौतामा अस्पतालका तर्फबाट महासचिब हिरामणी शर्मा पालिकाको तर्फबाट अध्यक्ष दिनेश लामा र हार्डवेयरको तर्फबाट सञ्चालक राम प्रसाद झाङले हस्ताक्षर गरेका छन् ।
गत असोज दोस्रो हप्ता परेको अबिरल बर्षाका कारण रोशी गाँउपालिकामा ठुलो धनजनको क्षति पुगेको अवस्थामा मनकामना हार्डवेयर सप्लायर्सले सामाजिक उत्तरदायित्व अन्तर्गत ४ लाख रुपैयाँ उपलब्ध गराई रोशी गाउँपालिकाका नागरिकहरुको निःशुल्क आँखाको उपचारका लागी सहयोग गरेको हो ।
उक्त सम्झौता कार्यक्रममा रोशी गाउँपालिकाका अध्यक्ष दिनेश लामाले रोशी गाउँपालिकाले गत वर्षहरुमा पनि रेयुकाई मासुनागा आँखा अस्पतालसँग समन्वय गरी पालिकाका नागरिकहरुको निःशुल्क आँखाको उपचार तथा मोतिबिन्दुको अप्रेसन गर्दै आएको बताउनुभयो।
गत असोजमा अबिरल बर्षा सँगै आएको बाढि पहिरोको कारण गाँउपालिकामा ठुलो धनजनको क्षति पुगेको अवस्थामा पालिकालाई साथ दिन रेयुकाई मासुनागा आँखा अस्पताल र मनकामना हार्डवेयर सप्लायर्सले सहयोग गरेकोमा अध्यक्ष लामाले धन्यवाद ज्ञापन गर्नुभयो ।
सम्झौतामा पालिका भित्र वडा गत रुपमा शिबिर सञ्चालन गर्ने, शिबिरमा मोतिबिन्दुको अप्रेसन गर्नु पर्ने देखिएमा अस्पतालमा ल्याई निःशुल्क अप्रेसन गर्ने रहेको छ ।
कार्यक्रममा अस्पतलको तर्फबाट कोषाध्यक्ष दिनेशराज कायस्थ, सह–सचिब धर्मभक्त प्रधान, पालिकाका उपाध्यक्ष मिम बहादुर वाईबा(ज्वाला), प्रमुख प्रशासकिय अधिकृत शिव प्रसाद भन्तना हार्डवेयरका सञ्चालक सज्जन कुमार अग्रवालको उपस्थिती रहेको थियो ।
