काभ्रे,
चीनमा आज बिहान गएको शक्तिशाली भूकम्पमा परी ३२ जनाको मृत्यु भएको छ । तिब्बतस्थित क्षेत्रीय विपद् राहत मुख्यालयलाई उद्धृत गर्दै समाचार संस्था सिन्ह्वाले ३२ जनाको मृत्यु भएको उल्लेख गरेको छ ।
सिन्ह्वाका अनुसार भूकम्पको केन्द्रविन्दु २८.५ डिग्री उत्तर अक्षांश र ८७.४५ डिग्री पूर्व देशान्तरमा मापन गरिएको थियो । आज बिहान नेपाली समय अनुसार ६ बजेर ५० मिनेटमा चीनको जिजाङ्ग प्रान्तको सिगात्सेस्थित दिङ्गी गाउँमा केन्द्रविन्दु भएर शक्तिशाली भूकम्प गएको थियो ।भूकम्पको धक्का नेपालमा समेत महसुस भएको थियो ।
नेपालको भूकम्प मापन केन्द्रले ७ म्याग्निच्युडको भूकम्प गएको रेकर्ड राखे पनि चीनको भूकम्प नेटवर्क केन्द्रले ६.८ तीव्रता मापन गरेको छ । यो भूकम्प १० किलोमिटर गहिराइमा थियो । भत्किएका भवनमा फसेकाको उद्धार र खोजी भइरहेकाले ज्यान गुमाउनेको सङ्ख्या बढ्न सक्ने सिन्ह्वाले जनाएको छ ।
एकाबिहानै गएको शक्तिशाली भूकम्पको कारण नेपालमा मानिसहरु त्रसित भइ घरबाहिर निस्केका थिए । नेपालमा भूकम्पबाट भएको क्षतिबारे अहिलेसम्म कुनै विवरण प्राप्त भएको छैन । गृह मन्त्रालयका अनुसार सरकारले क्षतिको विवरण सङ्कलनको काम थालिसकेको छ।
