काभ्रे,रेडियो रोशी,
रोशी गाउँपालिकाका एघार सय सत्र जना किशोरीहरुले पाठेघरको मुखको क्यान्सर विरुद्धको एचपिभी खोप लगाएका छन् । पालिकामा लक्षित वर्गका १,१४८ जना किशोरीहरुलाई पाठेघरको मुखको क्यान्सर गराउने एचपिभी (ह्युमन प्यापीलोमा भाइरस) विरुद्धको खोप लगाउने लक्ष्य रहेता पनि १,११७ जना अर्थात ९७ प्रतिशत किशोरीहरुले मात्र खोप लगाएका छन् । बिभिन्न कारणबस ३१ जना किशोरीहरुले खोप लगाउन छुटेको गाउँपालिकाको स्वास्थ्य शाखाका नर्सिङ फोकल पर्सन अञ्जली लामाले जानकारी दिनुभयो ।
पालिकामा मा.वि र आ.वि गरेर २४ वटा खोप केन्द्र निर्धारण गरिएको थियो । जसअन्तर्गत खोप लगाउने दिन विद्यालयमा अनुपस्थित भएका किशोरीहरुलाई स्वास्थ्य संस्थामै खोप केन्द्र तोकेर खोप लगाईएको उहाँले जानकारी दिनुभयो । पालिकाभित्रका खोप लगाउन छुटेका ३१ जना किशोरीहरुलाई एक महिनाभित्रमा पालिकाको स्वास्थ्य शाखामा सम्पर्क गरी खोप लगाउन उहाँले अनुरोध गर्नुभएको छ।
राष्ट्रिय खोप कार्यक्रम अन्तर्गत पाठेघरको मुखको क्यान्सर रोकथाम तथा नियन्त्रणका लागि जिल्लामा गत माघ २२ देखि २९ सम्म र फागुन १ देखि ६ गतेसम्म गरेर दुई चरणमा खोप अभियान सञ्चालन भएकोे थियो । नेपाल सरकारले विश्व स्वास्थ्य सङ्गठन (डब्लुएचओ) बाट प्रमाणित उक्त खोप कक्षा ६–१० विद्यालय समूहका तथा विद्यालय बाहिर रहेका १० वर्षदेखि १४ वर्ष उमेरका बालिकाका लागि उक्त खोप लगाइएको हो ।
