काभ्रे,
काभ्रे जिल्लाको भुम्लु गाउँपालिकामा ५७ वर्षिया दलित महिलामाथि निर्घात कुटपिट भएको घटना सार्वजनिक भएको छ । वडा नम्बर ४ चौबासको पाक्पा टोलमा बस्ने ५७ वर्षिया मसली सार्कीलाई चौबासकै विजय कुमार तामाङले निर्घात कुटपिट गरेका हुन् ।
तामाङलाई शुक्रवार पक्राउ गरिएको जिल्ला प्रहरी कार्यालय काभ्रेपलाञ्चोकका डिएसपी एवं सूचना अधिकारी मिन बहादुर घलेले जानकारी दिनुभयो । मसली सार्कीलाई विजय तामाङले फागुन ४ गते दिउँसो साढे ३ बजेतिर चौबास बजारमा सार्वजनिक स्थलमै कुटपिट गरेको प्रत्यक्षदर्शीले बताएका छन् । विजयले विष्णु प्रसाद चौलागाईले सञ्चालन गरेको चिया पसलमा जाँदा मसलीलाई पानी छ्यापेपछि विवाद उत्पन्न भएको थियो ।
विजयको कुटाईपछि बेहोस भएकी मसलीलाई श्रीमान कान्छो सार्कीले भोलीपल्ट घाइते अवस्थामा भेटेका थिए । मसलीको हाल धुलिखेल अस्पतालमा उपचार भैरहेको छ । मसलीलाई फागनु ५ गते धुलिखेल अस्पतलामा भर्ना गरिएको छोरा अम बहादुर सार्कीले बताउनुभयो । विजयको कुटाईबाट मसलीको देब्रे पट्टी खुट्टाको हड्डी फुटेको छ ।
उक्त दलित महिलालाई कुटपिट गरेका तामाङलाई २०८१ फागुन ५ गते प्रहरी चौकीमा बोलाई कुनै कारवाही प्रकृया अगाडि नबढाइ सामान्य कागज गरी छाडीएको पीडित पक्षले गुनासो गरेका छन् । आज जाहेरी जिप्रकामा बुझाउने अम बहादुरले बताउनुभयो ।
पक्राउ परेका विजयलाई जिल्ला प्रहरी कार्यालय काभ्रेपलाञ्चोकले अनुसन्धानका लागि जिल्ला अदालतबाट म्याद थप गर्ने तयारी गरेको छ ।
