काभ्रे,रेडियो रोशी,
काभ्रे जिल्लाको रोशी गाउँपालिकामा गृहिणी महिलाहरुको आयआर्जन बढाउन गृहिणी महिला सशक्तिकरण कार्यक्रमको अभिमुखीकरण गराईएको छ । आज रोशी गाउँपालिकाका उपाध्यक्ष मिम बहादुर वाईबाको अध्यक्षतामा अभिमुखिकरण कार्यक्रम सञ्चालन भएको हो ।
बाग्मती प्रदेश सरकारको सामाजिक बिकास कार्यालय र रोशी गाउँपालिकाको साझेदारी एवं सहकार्यमा पालिकाको बिभिन्न ४ वटा वडाहरुमा गृहिणी महिला सशक्तिकरण कार्यक्रम हुन लागेको हो । बाग्मती प्रदेश सरकारको सामाजिक बिकास कार्यालयको ८५ प्रतिशत र गाउँपालिकाको १५ प्रतिशत लागतमा कार्यक्रम हुन लागेको हो । यो कार्यक्रम जम्मा १६ लाख ७० हजारको लागतमा सञ्चालन हुने बताईएको छ ।
कार्यक्रममा पालिकाका प्रमुख प्रसाशकीय अधिकृत शिव प्रसाद भन्तनाले स्वागत मन्तब्य तथा कार्यक्रमको उदेश्यबारे प्रस्ट पार्नुभएको थियो । गृहिणी महिलाको आयआर्जन बढाउन तथा आर्थिक रूपमा आत्मनिर्भर बनाउन, उनीहरूको सीप र क्षमता विकास गर्ने उदेश्यले यो कार्यक्रम सञ्चालन गर्न लागिएको प्रमुख प्रसाशकीय अधिकृत शिव प्रसाद भन्तनाले जानकारी दिनुभयो । त्यसैगरी सामाजिक बिकास कार्यालय धुलिखेलका प्रमुख रन माया फ्याक र महिला विकास निरीक्षक मन्जु कार्कीले उपस्थितहरुलाई अभिमुखिकरण गराउनुभएको थियो ।
यो आर्थिक बर्षमा पालिकाको ३, ७, ११ र १२ नम्बर वडामा यो कार्यक्रम सञ्चालन हुने भएको छ । कार्यक्रम अन्तर्गत वडा नम्बर ११ मा मौरीपालन सम्बन्धी तालिम दिईने प्रमुख प्रसाशकीय अधिकृत शिव प्रसाद भन्तनाले जानकारी दिनुभयो । त्यसैगरी ३, ७ र १२ नम्बर वडामा बेमौसमी तरकारी खेती सम्बन्धी तालिम दिईने उहाँले बताउनुभयो । प्रत्येक वडाबाट २० देखी २५ जनालाई १५ दिनको तालिम दिईने छ ।
कार्यक्रममा वडा नं. ३ का वडा अध्यक्ष धनजीत लामा, वडा नं. ७ का वडा अध्यक्ष अशोक कुमार गौतम, वडा नं. ११ का वडा अध्यक्ष लाल कुमार पाख्रीन, वडा नं. १२ का वडा अध्यक्ष बसन्त कुमार तामाङ , पालिकाका बिभिन्न शाखाका प्रमुखहरु लगायत ४ वटै वडाका करिब ५० जना नागरिकहरुको सहभागिता रहेको थियो ।
