काभ्रे,
नेपाल शिक्षक महासङ्घले काठमाडौँ केन्द्रित आन्दोलन थप चर्काउने भएको छ । शिक्षक आन्दोलन आज २१ औँ दिनमा प्रवेश गरेको छ । आज आन्दोलनको समयसमेत परिवर्तन भएको छ । महासङ्घले बिहान ९ बजेदेखि आन्दोलन गर्दै आएकोमा आजदेखि भने बिहान ११ बजेदेखि सुरु गरेर दिउँसो २ बजेसम्म प्रदर्शन गर्ने भएको हो ।
विद्यालय शिक्षा ऐन तत्काल जारी गर्न माग गर्दै महासंघको आह्वानमा देशभरका सामुदायिक विद्यालयका अधिकांश शिक्षक चैत २० गतेदेखि काठमाडौं केन्द्रित आन्दोलनमा छन् ।
यसैबिच,नेपाल विद्यालय कर्मचारी परिषद्ले नेपाल शिक्षक महासङ्घको अगुवाइमा काठमाडौंमा जारी आन्दोलनमा सहभागी हुन सम्पूर्ण विद्यालय कर्मचारीहरूलाई निर्देशन दिएको छ । परिषद्का अध्यक्ष गङ्गाराम तिवारी र महासचिव शान्तिनाथ योगीले मङ्गलबार साँझ एक संयुक्त विज्ञप्ति जारी गरी प्रेस विज्ञप्ति जारी २४ घण्टाभित्र कार्यालयको चाबी लिएरै आन्दोलनमा अनिवार्य उपस्थित हुन निर्देशन दिनुभएको हो ।
विज्ञप्तिमा शैक्षिक हड्ताल भइरहेको अवस्थामा समग्र शिक्षा क्षेत्रको अग्रगामी परिवर्तनका लागि र कर्मचारीको हक अधिकार स्थापित गर्ने परिवर्तनगामी महान यात्रामा छुट्ने अधिकार कसैलाई नभएको उल्लेख गरिएको छ ।
