काभ्रे,
रोशी गाउँपालिकाको आगामी आर्थिक बर्ष २०८२/८३ को नीती, कार्यक्रम र बजेट सर्वसम्मत रुपमा पारित भएको छ । गत मंगलबार बसेको गाउँसभाको १७औ अधिवेशनको पहिलो बैठकले प्रस्ताव गरेको नीति, कार्यक्रम तथा बजेट आज बसेको दोस्रो बैठकले सर्बसम्मत रुपमा पारित भएको हो । सभाको अधिवेशनको पहिलो बैठकले गत मंगलबार आर्थिक बर्ष २०८२/०८३ को लागि ७२ करोड ४ लाख ३७ हजार बजेट प्रस्तुत गरेकोमा आजको दोस्रो बैठकले पारित गरेको हो ।
अधिवेशनको पहिलो बैठकमा उपाध्यक्ष मिमबहादुर वाइबाले प्रस्तुत गर्नुभएको विनियोजन विधेयक, आर्थिक विधेयक, स्थानीय उद्योग दर्ता, सञ्चालन, व्यवस्थापन र नियमनसम्बन्धी विधेयक, जलाधार, वन्यजन्तु, खानी तथा खनिज पदार्थको संरक्षण तथा उपभोगसम्बन्धी विधेयक र न्यायीक समितिको वार्षिक प्रगति प्रतिवेदन सर्वसम्मत पारित भएको छ। त्यसैगरी लेखा समिति संयोजक धनजीत लामाले प्रस्तुत गर्नुभएको बेरुजु फर्छौटका लागि प्रस्ताव र गाउँपालिकाका प्रवक्ता वसन्तकुमार स्याङ्तानले प्रस्तुत गर्नुभएको आर्थिक बर्ष २०८१/०८२ को प्रगती प्रतिवेदन पनि सर्वसम्मत पारित भएको छ ।
