काभ्रे,
गत असोज दोस्रो साताको बाढी पहिरोबाट अति प्रभावित रोशी गाउँपालिकामा विपद प्रतिकार्य सम्बन्धी अन्तर्कृया गरिएको छ । आज गाउँपालिकाको आयोजनामा जिल्ला विपद व्यवस्थापन समिति र स्थानीय विपद व्यवस्थापन समितीबीच विपद जोखिम न्युनिकरण गर्न अन्तरक्रिया गरिएको हो ।
अन्तरक्रियाको क्रममा गाउँपालिका अध्यक्ष तथा स्थानीय विपद् व्यवस्थापन समितिका अध्यक्ष दिनेश लामाले विपदपछिको खोज, उद्दार, राहतमा सकृयता देखाएको संघ र प्रदेश सरकार पुनर्निर्माणको काममा भने अल्मलिएको बताउनुभयो । सडक, नीजि आवास, सार्वजनिक भवन, अस्पताल, औद्योगिक ग्राम लगायतका संरचना निर्माण गर्न बाँकी रहेको बताउनुहुँदै बाढी पहिरोबाट अति प्रभावित गाउँपालिका अझै सतर्क भएर काम गर्नुपर्ने बताउनुभएको छ । यसका लागि सबैको साथ सहयोग अपरिहार्य रहेको बताउनुभयो ।
गाउँपालिकाका उपाध्यक्ष मिमबहादुर वाइबा (ज्वाला) ले विपद व्यवस्थापनको लागि सरोकारवाला सबै संग सहकार्य गर्दै अघि बढ्ने बताउनुभएको छ ।
जिल्ला विपद् व्यवस्थापन समितिका संयोजक समेत रहनुभएको प्रमुख जिल्ला अधिकारी उमेशकुमार ढकालले सबैको सुझाव र सहभागितासहित मनसुन पूर्वतयारी कार्ययोजना निर्माण गर्न सबै स्थानीय तहमा छलफल र अन्तरक्रिया थालिएको बताउनुभयो ।
गाउँपालिकाका प्रमुख प्रशासकीय अधिकृत शिवप्रसाद भन्तनाले बाढी र पहिरोको जोखिममा रहेकाको तथ्याकं अध्यावद्यिक गरेर व्यवस्थापनको लागि सहकार्य गर्ने बताउनुभयो ।
अन्तरक्रियामा कार्यक्रममा सहभागी विभिन्न वडाका वडा अध्यक्षहरुले पालिका भित्र बाढी, पहिरोको जोखिम भएको केही स्थानमा हवाई उद्दार सम्भव नभएकाले पूर्वाधारहरु तयार गर्नुपर्ने धारणा राखेका छन् ।
त्यसैगरी गाउँपालिकाका विपद फोकल पर्सन इञ्जिनियर भुपेन्द्र अधिकारीले विपद व्यवस्थापनको लागि अन्तर पालिका समन्वयका साथै विपद सहायता कक्ष समेत स्थापना गरिएको जानकारी दिनुभयो ।
कार्यक्रममा जिल्ला प्रहरी कार्यालय काभ्रेका प्रमुख प्रहरी उपरिक्षक (एसपी) कोमल शाह, नेपाली सेनाका प्रमुख सेनानी राममणि सापकोटा, सशस्त्र प्रहरी बल, १५ नं गण हेडक्वाटरका गणपति सशस्त्र प्रहरी उपरिक्षक प्रेम प्रसाईं लगायतको सहभागिता रहेको थियो ।
