काभ्रे,रेडियो रोशी,
काभ्रे जिल्लाको नमोबुद्ध नगरपालिकामा मानव बेचबिखन बिरुद्दको १९औं राष्ट्रिय दिवसको आवसरमा सचेतना तथा अन्तरक्रिया कार्यक्रम सम्पन्न भएको छ । आज प्रमुख जिल्ला अधिकारी उमेश कुमार ढकालको प्रमुख आतिथ्यता तथा नगर प्रमुख एवं नगर स्तरीय मानव बेचबिखन विरुद्धको समिति संयोजक कुनसाङ लामाको अध्यक्षतामा “तीनै तहका सरकार मिली गरौ हातेमालोः मानव बेचविखनको हटाऔ दुष्चक्रको जालो” भन्ने नाराको साथ सचेतनात्मक कार्यक्रम गरीएको हो । कार्यक्रमको सुरुवातमा नगरपालिकाका प्रमुख प्रशासकिय अधिकृत कृष्ण गिरिले स्वागत मन्तब्य राख्नुभएको थियो ।
कार्यक्रममा मानव अधिकारकर्मी भोजराज तिमल्सिनाले मानव बेचबिखन सम्बन्धी प्रस्तुतीकरण दिनुभएको थियो । उहाँले मानव बेचबिखन भनेको के हो? विश्वका केहि देसहरुमा मानव बेचबिखन तथा ओसारपसारको अवस्था, मानव बेचबिखन सम्बन्धी तथ्यहरु, नेपालको वर्तमान समयमा मानव बेचबिखनको अवस्था, मानव बेचबिखनको प्रकार, बेचिएका नारीहरुले भोगेका यातनाहरु, मानव बेचबिखन तथा ओसारपसारमा नियन्त्रण एन, नियमावली र प्रावधान बारेमा प्रस्तुतीकरण दिनुभएको थियो ।
परीवारको आर्थिक स्थिति कमजोरीको कारण मानव बेचबिखन हुने गरेको उहाँले बताउनुभयो । आर्थिक स्थिति कमजोर भएको परीवारमा आकर्षक रोजगारीको प्रलोभनमा पारेर बिदेश पुर्याई बेचबिखन हुने गरेको उहाँको भनाई छ । हालको समयसम्म नेपालका करिव दुई लाख पचास हजार युवतीहरु बिभिन्न देशको कोठिमा बिक्रि भएको बताउनुभयो । सामाजिक सञ्जालको दुरुपयोगले पनि मानव बेचबिखन तथा ओसारपसार हुने गरेको उहाँले बताउनुभयो ।
काभ्रे जिल्लामा हालसम्म मानव बेचबिखनको ४८ वटा घटनाहरु सार्वजनिक भएको उहाँले बताउनुभयो । जसमा ४१ जना महिला र ७ जना पुरुस रहेका छन् । जनजाति २०, बाहुन क्षेत्री १७, दलित ७ र नेवार समुदायका ४ जना रहेका छन् । यसमा बेचिएकाहरुको उमेर १२ देखी ४० बर्षसम्म रहेको छ । बेचबिखनका घटनाहरु बढिजसो चिनजानकै मानिसहरुबाट भएको र अधिकांश मुद्धाहरु प्रहरी कार्यालयमा नआउने गरेको उहाँको भनाई छ ।
कार्यक्रममा बोल्नुहुदै प्रमुख जिल्ला अधिकारी उमेश कुमार ढकाले मानव बेचबिखन तथा ओसारपसारको बिरुद्धमा सबै नागरीकहरु सचेत र एकजुट भएर लागेमा यस्ता घटना क्रमशः निर्मुल पार्न सकिने धारणा राख्नुभयो । नेपाल भित्रैपनि गाउँबाट सहरमा पुर्याएर मानव बेचबिखन हुने गरेको उहाँको भनाई छ । काभ्रे जिल्ला मानव बेचबिखनको अत्यन्त जोखीम जिल्लाको रुपमा रहेको बताउनुहुदै उहाँले यस्ता कार्यक्रमहरु प्रत्येक स्थानीय तहहरुको वडा वडामै गरेर नागरिकहरुमा जनचेतना फैलाउन अति आवस्यक रहेको बताउनुभयो । बेचिएर घर फर्किएकाहरुलाई समाजमा अवहेलना हुनेगरेको बताउनुहुदै उनीहरुलाई समाजमा पुनस्थापित गराउन एकजुट भएर लाग्न उहाँले आग्रह समेत गर्नुभयो ।
नगरप्रमुख, उपप्रमुख वडा अध्यक्ष लगायतले मानव बेचबिखन रोकथामको मुख्य उपाय सचेतना फैलाउनुपर्ने रहेको बताउदै यस्ता कार्यक्रमलाई निरन्तरता दिएर टोल टोलमा सचेतना फैलाउने बताएका थिए ।
कार्यक्रममा जिल्ला प्रशासन कार्यालय काभ्रेका सहायक प्रमुख जिल्ला अधिकारी सुदर्शन श्रेष्ठ, जिल्ला सरकारी वकिल कार्यालय काभ्रेका स.जि.न्या कृष्णा भन्डारी, जि.प्र.का.काभ्रेका प्रहरी नायब उपरिक्षक मीन बहादुर घले, माईती नेपालका प्रतिनिधि गायत्री गौतम, ईन्सेक काभ्रेका प्रतिनिधि सुमित्रा आचार्य, नगर युवा परिषद्का कार्यकारी उपाध्यक्ष रामेश्वर अधिकारी, प्रहरी चौकि भकुन्डेबेशीका ईन्चार्ज गोपाल खड्का, बिभिन्न वडाका वडा अध्यक्षहरु, पत्रकार देबराज उप्रेती, विभिन्न संघ–संस्थाहरूका प्रतिनिधिहरू, पालिकाका बिभिन्न शाखाका शाखा प्रमुखहरु लगायतको सहभागिता रहेको कार्यक्रम नगरपालिकाका महिला, बालवालिका, जेष्ठ नागरिक तथा समाज कल्याण शाखा प्रमुख तारादेवी सुनुवारले सञ्चालन गर्नुभको थियो ।
