काभ्रे,रेडियो रोशी,
काभ्रे जिल्लाको रोशी गाउँपालिकामा बिपद ब्यबस्थापन सम्बन्धी अन्तरपालिका स्तरीय बैठक सम्पन्न भएको छ । आज गाउँपालिका अध्यक्ष दिनेश लामाको अध्यक्षतामा रोशी गाउँपालिका, नमोबुद्ध नगरपालिकाका, तेमाल गाउँपालिका, महाभारत गाउँपालिका र सुनकोशी गाउँपालिकाका प्रमुख उपप्रमुख, निर्माण व्यवसायीहरू तथा सुरक्षा निकायका अधिकृतहरुबीच बैठक बसेको हो ।
बैठकले विपद्को समयमा रोडको अवस्था, सडक निर्माण कार्यको तत्काल सूचना प्रवाह, उद्धार तथा जोखिम न्यूनीकरणका लागि सहकार्य गर्ने निर्णय गरेको छ । यसका लागि सम्बन्धित पालिकाहरु तथा निर्माण व्यवसायीहरूबीच समन्वय गरी आर.आर.टि (¥यापिड रेस्पोन्स टिम) गठन गरी अन्तरपालिका सहकार्यलाई मजबुत बनाउने निर्णय भएको छ । यसका लागि सम्बन्धीत पालिकाहरुले एउटा छुट्टै व्हाट्सएप ग्रुप तथा ईमेलबाट तत्काल सूचना प्रदान गर्ने सहमति जनाएका छन् ।
त्यसैगरि बैठकले विपद्को समयमा विभिन्न पालिकामा रहेका उद्धार सामग्रीहरू आवश्यकताअनुसार एकआपसमा सहकार्य गरी परिचालन गर्ने निर्णय गरेको छ ।
रोशी गाउँपालिकाका प्रमुख प्रशासकीय अधिकृत टंक बहादुर नेगीले सञ्चालन गर्नुभएको बैठकमा जिल्ला समन्वय समिति काभ्रेपलाञ्चोकका उपप्रमुख रिमबहादुर वाईबा, नमोबुद्ध नगरपालिकाका नगरप्रमुख कुनसाङ लामा, तेमाल गाउँपालिका अध्यक्ष चन्द्र लामा, महाभारत गाउँपालिका अध्यक्ष कान्छालाल जिम्बा, सुनकोशी गाउँपालिका सिन्धुलीका अध्यक्ष दिपा बोहरा दाहाल, कालिञ्चोक गाउँपालिका दोलखाका अध्यक्ष अर्जुन सिवाकोटी, रोशी गाउँपालिका उपाध्यक्ष मिमबहादुर वाइबा, तेमाल गाउँपालिका उपाध्यक्ष दलमान थोकर, जिल्ला प्रहरी कार्यालय काभ्रेका प्रमुख प्रहरी उपरिक्षक रबिन कार्की, सशस्त्र प्रहरी बलका एस.पी. माधव रेग्मी, जिल्ला प्रशासन कार्यालय काभ्रेका प्रशासकीय अधिकृत सुनिता थापा, बिपि राजमार्ग पुनःनिर्माणमा संलग्न निर्माण व्यवसायीहरु, वडाअध्यक्षहरु र सुरक्षा निकायका अधिकृतहरुको सहभागीता रहेको थियोे ।
