काभ्रे,रेडियो रोशी,
काभ्रे जिल्लाको रोशी गाउँपालिकाले आफ्नो क्षेत्रभित्र पर्ने वीपी राजमार्ग स्तरोन्नतिको काम गरिरहेका निर्माण कम्पनीहरूलाई प्रयोग भएको निर्माण सामग्रीहरुको तत्काल राजस्व बुझाउन ताकेता गरेको छ। गाउँपालिका क्षेत्रभित्रकै ढुङ्गा, गिट्टी, बालुवा प्रयोग गरिरहेको भए तापनि हालसम्म कुनै राजस्व दाखिला नगरेको भन्दै गाउँपालिकाले निर्माण कार्यमा संलग्न तीनवटा निर्माण कम्पनीहरूलाई पत्र काट्दै राजस्व बुझाउन निर्देशन दिएको हो।
गाउँपालिकाका प्रमुख प्रशासकीय अधिकृत टंक बहादुर नेगीद्वारा हस्ताक्षरित जारी पत्रअनुसार श्री लामा÷नवकान्तिपुर जे.भी. (महाराजगंज, काठमाडौं), श्री खानी÷ए.वान÷कमलजीत जे.भी. (तिनकुने, काठमाडौं) र श्री उमा एण्ड कम्पनी÷भण्डारी÷अमरज्योती जे.भी. (गठ्ठाघर, भक्तपुर) लाई राजस्व दाखिला गर्न भनिएको छ। मिति २०८३ जेठ २५ गते बसेको गाउँ कार्यपालिकाको ५१ औं बैठकको निर्णय बमोजिम गाउँपालिकाले यो कदम चालेको हो।
ढुङ्गा, गिट्टी, बालुवा उत्खनन् बिक्री तथा व्यवस्थापन सम्बन्धी मापदण्ड २०७७ को दफा १२ को उपदफा (७) बमोजिम सडक निर्माण वा विस्तारको क्रममा सडक अधिकार क्षेत्र भित्रबाट निस्कने यस्ता निर्माण सामग्री सम्बन्धित आयोजनाले उपयोग गर्दा त्यसको परिमाणका आधारमा लाग्ने बिक्री मूल्य बापतको रकम स्थानीय तहलाई बुझाउनुपर्ने कानुनी व्यवस्था छ।
त्यस्तै, सोही मापदण्डको दफा ४ बमोजिम स्वीकृत वातावरणीय अध्ययन प्रतिवेदनमा आयोजनालाई चाहिने सामग्रीको परिमाण र उत्खनन् स्थल स्पष्ट खुलाउनुपर्ने व्यवस्था छ। तर, ती कम्पनिहरुले सडक अधिकार क्षेत्रभित्रकै ढुङ्गा प्रयोग गरिरहेको देखिए पनि हालसम्म स्थानीय सरकारलाई कुनै राजस्व नबुझाएको पाईएको छ ।
समयमै राजस्व दाखिला नगरेमा आवश्यक कानुनी कारबाहीको प्रक्रिया अगाडि बढाइने चेतावनी समेत गाउँपालिकाले दिएको छ। उक्त पत्रको बोधार्थ राष्ट्रिय समन्वय परिषदको सचिवालय, पूर्वाधार विकास मन्त्रालय, सडक विभाग, जिल्ला समन्वय समिति, जिल्ला प्रशासन कार्यालय, जिल्ला प्रहरी कार्यालय काभ्रेपलाञ्चोक, सडक डिभिजन भक्तपुर र इलाका प्रहरी कार्यालय मंगलटारलाई समेत दिइएको छ।
