काभ्रे,रेडियो रोशी,
काभ्रे जिल्लाको रोशी गाउँपालिकाले आगामी आर्थिक बर्ष २०८३÷०८४ को लागि ७३ करोड ९६ लाख १८ हजार ६ सय ५७ रुपैयाँको बजेट प्रस्ताव गरेको छ । गाउँसभाको १९ औँ अधिवेशनको पहिलो बैठकमा उपाध्यक्ष मिम बहादुर वाईवा (ज्वाला) ले बजेट प्रस्तुत गर्नुभएको हो । गाउँपालिकाले २०८२ असोज महिनामा आएको बाढीले सिर्जना गरेको प्राकृतिक प्रकोपबाट भएको क्षतिलाई संबोधन गर्ने लक्ष सहित बजेट स्वीकृत गरेको हो ।
चालु आ.व का लागि गाउँसभाको १७ औ अधिवेशनबाट कुल रु. ७२ करोड ४ लाख ३७ हजारको आय स्वीकृत गरिएकोमा गाउँ सभाको १८ औं अधिवेशनबाट २०८२ असोज महिनामा आएको बाढीले सिर्जना गरेको प्राकृतिक प्रकोपबाट भएको क्षतिलाई संबोधन गर्ने लक्ष्य सहित रु. १,९१,८०,९७८ को पूरक बजेट समेत गरी रु.७३,९६,१८,६५७ को आय व्यय स्वीकृत भएको हो ।
हालसम्म ६८ करोड ७५ लाख ७३ हजार आय भएको छ। त्यसै गरी हालसम्मको व्यय रु ५४ करोड ३६ लाख ७२ हजार भएकोमा चालु तर्फ ४३ करोड १४ लाख ६ हजार अर्थात चालु बजेटको ७९.२७ प्रतिशत र पुँजिगत तर्फ ११ करोड २२ लाख ६६ हजार अर्थात पुँजिगत बजेटको ५७.४६ प्रतिशत वित्तीय प्रगति भएको छ।
जसमध्ये आर्थिक विकास क्षेत्रमा ५३.८९ प्रतिशत, सामाजिक विकास क्षेत्रमा ८१.४२ प्रतिशत, पूर्वाधार विकास क्षेत्रमा ५८.१४ प्रतिशत र वनबातावरण तथा विपद व्यवस्थापन क्षेत्रमा ६४.८६ प्रतिशत र संस्थागत विकास तथा सुशासन क्षेत्रमा ७०.७० प्रतिशत वित्तीय प्रगति भएको छ ।
सभामा पालिका अध्यक्ष दिनेश लामाले “समृद्ध रोशी, जनता खुसी” भन्ने लक्ष पुरा गर्न तयार पारीएको आगामी आर्थिक बर्ष २०८३÷०८४ को वार्षिक नीति तथा कार्यक्रम प्रस्तुत गर्नुभएको थियो । गाउँपालिकाले ६० वर्षमाथि र ७० वर्षमुनिका ज्येष्ठ नागरिक, दलित, एकल महिला, महिला स्वास्थ्य स्वयंसेविका र विपन्न नागरिकको निःशुल्क स्वास्थ्य बीमा गर्ने प्रबन्ध मिलाएको छ । संघीय सरकारले ७० बर्ष माथिका जेष्ठ नागरिकलाई सामाजिक सुरक्षा भत्ताका साथै निशुल्क स्वास्थ्य विमा गर्दै आएको छ । महिला स्वास्थ्य स्वंयमसेविकाको लागि बिमा प्रिमियमको ५० प्रतिशत सरकारले बोहोर्दै आएकोमा रोशी गाउँपालिकाले थप सुविधा उपलव्ध गराएको हो । रोशीले सामुदायिक विद्यालयमा कक्षा ६ देखि १२ सम्म अध्ययनरत विद्यार्थीहरूलाई पनि निःशुल्क दिवा खाजाको व्यवस्था गर्ने भएको छ । यसका लागि ६९ लाख रुपैयाँ बजेट प्रस्ताव गरिएको छ । संघीय सरकारले कक्षा १ देखि ५ मा अध्ययनरत विद्यार्थीको लागि मात्रै दिवा खाजा उपलव्ध गराउँदै आएको थियो ।
रोशी गाउँपालिकाले तीनधारे झरना, ताराखसे लेक, भूमिचुली डाँडा र बाह्रवर्षे गोदावरी मेला लाग्ने चैत्य पानी लेक जस्ता क्षेत्रहरूको संरक्षण र व्यवस्थापनका लागि कार्यविधि बनाएर समिति गठन गर्ने नीति तथा कार्यक्रममा उल्लेख छ । ती क्षेत्रको पूर्वाधार निर्माण सम्पन्न गरी पर्यटक भित्र्याइने र पर्यटन प्रवद्र्धनका लागि राष्ट्रिय तथा अन्तर्राष्ट्रिय स्तरमा भगिनी सम्बन्ध विस्तार गर्न पहल गरिने नीति लिइएको छ ।
बाढी र पहिरोबाट प्रताडित गाउँपालिकाले नीजि आवास पुनर्निर्माण र प्रबलिकरणलाई जोड दिँदै ६० लाख रकम विनियोजन गरेको छ । विगतका प्राकृतिक विपद् र बाढीपहिरोले पु¥याएको क्षतिको कुशल व्यवस्थापन गर्दै पालिकालाई समृद्ध बनाउने संकल्प गाउँपालिकाको छ ।
गाउँपालिका प्रवक्ता तथा वडा नं. १२ का वडा अध्यक्ष बसन्त कुमार स्याङ्तानले वार्षिक प्रगति प्रतिवेदन प्रस्तुत गर्नुभएको थियो । त्यसैगरी गाउँपालिका उपाध्यक्ष मिम बहादुर वाईवा (ज्वाला) ले वार्षिक कार्यक्रम तथा बजेट वक्तव्य, विनियोजन विधेयक र आर्थिक विधेयक, गाउँपालिकाको वन व्यवस्थापन सम्बन्धमा व्यवस्था गर्न बनेको विधेयक, २०८३ र लैङ्गिक हिंसा, मावन बेचविखन तथा ओसारपसार र घरेलु हिंसाका पीडितहरुको संरक्षणका लागि कोष र केन्द्रको स्थापना तथा सञ्चालन सम्बन्धमा व्यवस्था गर्न बनेको विधेयक, २०८३ र न्यायिक समितिको वार्षिक प्रगति प्रतिवेदन प्रस्तुत गर्नुभएको छ । न्यायिक समितिको वार्षिक प्रगति प्रतिवेदन अनुसार २०८२÷०८३ को श्रावण १ गतेदेखि हालसम्म कुल विबाद दर्ता १७ वटा रहेको छ । जसमा मेलमिलापबाट विबाद समाधान ९ वटा, चालु अवस्थामा रहेको ५ वटा र फर्छौट भएको १२ वटा रहेको छ ।
