काभ्रे,
जिल्ला प्रशासन कार्यालय काभ्रेपलाञ्चोकको सेवा थप प्रभावकारी बन्ने भएको छ । गृह मन्त्रालयको राष्ट्रिय परिचयपत्र तथा पञ्जीकरण विभागले एउटा स्टेशनका लागि आवश्यक सामाग्री पठाएको छ । नागरिकको बैयक्तिक तथा जैविक विवरण समेत भएको राष्ट्रिय परिचयपत्र वितरणका लागि साउन ३१ गते विभागले आवश्यक पर्ने सामाग्रीे पठाएसंगै अब तीन वटा स्टेशनबाट विवरण दर्ता शुरु गरिने भएको छ । सेवाग्राहिहरुको चापका कारण जिल्ला प्रशासन कार्यालय काभ्रेपलाञ्चोकले विहान ७ बजे देखि साँझ साढे ७ बजेसम्म दिन थालेको सेवा अझै प्रभावकारी हुने भएको छ । सेवाग्राहिहरुले तोकिएको समय भित्र आउँदा पनि सेवा उपलब्ध हुन्छ भन्ने विश्वास दिलाएपनि सेवाग्राहिहरु लाईन बस्न नछाडेको बताउँदै अब तिन वटा स्टेशनबाट सेवा शुरु हुने भएकाले समस्या समाधान हुने अपेक्षा गरिएको प्रमुख जिल्ला अधिकारी हुमकला पाण्डेले बताउनुभयो ।
दैनिक ८० जनाको क्षमता हुँदा पनि एक सय भन्दा धेरैको फोटो खिच्ने गरिएको थियो । अहिले दैनिक १ सय ५० भन्दा धेरैको फोटो खिचाउँदा पनि सर्वसाधारणको लाईन घटेको थिएन । प्रशासन कार्यालयले भिड ब्यवस्थापनका लागि १३ वटा पालिकालाई बार अनुसारको समय तोकेको थियो । उक्त समय भित्र परिचयपत्र बनाउन आउनेहरुको भिडले प्रशासन कार्यालय अस्तब्यस्त बनेको महिनौ भई सकेको थियो । तीनवटा स्टेशन भए सँगै भिड कम भई सेवा सहज हुने अपेक्षा गरिएको छ ।
