काभ्रे,
रोशी कप २०७९ को प्रथम उपाधि रोशी ९ पिन्थलीले हातपार्न सफल भएको छ । त्यसैगरी उपविजेता रोशी १० वाल्टिङले हासिल गरेको छ । आजको फाइनल खेल रोशी ९ र रोशी १० विच भएको थियो । रोशी ९ ले रोशी १० लाई ० का विरुद्ध ३ गोलको अन्तरमा उपाधि चुम्न सफल भएको हो । रोशी गाउँपालिकाको सहयोग तथा पिन्थली युवा क्लवको आयोजनामा भएको उक्त खेलमा विजेता टिम रोशी ९ पिन्थलीलाई कार्यक्रमका सभापति तथा पिन्थली युवा क्लवका अध्यक्ष राजकुमार लामा, प्रमुख अतिथि गाउँपालिका अध्यक्ष दिनेश लामा, विशेष अतिथि गाउँपालिका उपाध्यक्ष मिम बहादुर वाईवा ज्वाला तथा प्रमुख प्रशासकिय अधिकृत रामबहादुर तामाङद्धारा नगद रु. १ लाख सहित ट्रफि, मेडल, प्रमाण पत्र सहित सम्मान गरिएको छ ।
त्यसैगरी उपविजेता रोशी १० को टिमलाई नगद रु. ५० हजार सहित ट्रफि, मेडल र प्रमाणपत्र सहित सम्मान गरिएको छ । वेस्ट गोल किपर सरोज लामा, वेस्ट गोलकर्ता सुरज ठकुरी, वेस्ट खेलाडीको उपाधि सुमन श्रेष्ठलाई वितरण गरिएको छ । असोज २१ गतेदेखि सुरु भएको उक्त खेलमा रोशी गाउँपालिका, सुनकोशी गाउँपालिका, तेमाल गाउँपालिका र नमोबुद्ध नगरपालिकाका वडा र क्लव गरी जम्मा २१ ओटा टिम बिच प्रतिस्पर्धा भएको थियो ।
कार्यक्रममा वडा नम्बर १० को वडा अध्यक्ष विकेन लामा, ११ का वडा अध्यक्ष लालकुमार पाख्रिन, इलाका प्रहरी कार्यालयका प्रहरी निरीक्षक हरी बहादुर बस्नेत,नेपाल रेडक्रस सोसाइटीका जिल्ला सदस्य ज्ञान बहादुर लामा, नेपाल रेडक्रस सोसाईटी मंगलटार शाखाका अध्यक्ष दामोदार श्रेष्ठ, रोशी ११ का निवर्तमान वडा अध्यक्ष मिलन लामा लगायत स्थानीय समाजसेवी तथा खेलाडीहरुको उपस्थिति रहेको थियो ।
