काभ्रे,
काभ्रे जिल्लाकोे १३ वटा स्थानीय सरकारमध्ये सबैभन्दा धेरै बजेट पाउने नगरमा बनेपा र गाउँपालिका तर्फ रोशी गाउँपालिका पहिलो बनेको छ । संघीय सरकारले प्रदेश र स्थानीय सरकारका लागि आगामी आर्थिक वर्ष २०८०÷०८१ का लागि बजेट तोकेको थियो , जस अनुसार काभ्रेपलाञ्चोक जिल्लाका १३ वटा स्थानीय सरकारका लागि कुल ५ अर्ब १३ करोड २२ लाख रुपैयाँ विनियोजन गरिएको छ । जिल्लाको सबैभन्दा बढी बजेट पाउनेमा बनेपा नगरपालिका पहिलो नम्बरमा परेको छ ।
बनेपा नगरपालिकाले संघीय सरकारको ५४ करोड, ५९ लाख रुपैयाँ बजेट पाएको छ । पनौती नगरपालिकाले ५० करोड ९३ लाख, धुलिखेल नगरपालिकाले ४५ करोड ७५ लाख, नमोबुद्ध नगरपालिकाले ४२ करोड, ५० लाख, पाँचखाल नगरपालिकाले ४१ करोड ६९ लाख र मण्डनदेउपुर नगरपालिकाले ४० करोड, ८१ रुपैयाँ बजेट प्राप्त गरेको छ ।
७ वटा गाउँपालिका मध्ये रोशी गाउँपालिकाले सबैभन्दा बढी बजेट पाएको छ । रोशी गाउँपालिकाले ४३ करोड ४० लाख रुपैयाँ, चौरीदेउराली गाउँपालिकाले ३८ करोड २ लाख, महाभारत गाउँपालिकाले ३५ करोड ३४ लाख, तेमाल गाउँपालिकाले ३२ करोड ५ लाख, भुम्लु गाउँपालिकाले ३१ करोड ९३ लाख, बेथानचोक गाउँपालिकाले २९ करोड ९८ लाख र खानीखोला गाउँपालिकाले २६ करोड, २३ लाख रुपैयाँ बजेट प्राप्त गरेको छ ।
