काभ्रे,
नेपाली कांग्रेस काभ्रेले अविरल बर्षापछि आएको बाढी र पहिरोकोमा परि जिल्लाभित्र ज्यान गुमाएका ७८ जनाकै परिवारमा जाने निर्णय गरेको छ । आज शुक्रवार बसेको जिल्ला कार्यसमितिको बैठकले शोक प्रस्ताव पारित गर्दै असोज १० देखि १२ सम्म परेकोे अविरल बर्षापछिको बाढी र पहिरोको कारण जिल्लाभित्र ज्यान गुमाएका मृतकका परिवारलाई समवेदना प्रकट गर्न र अवस्था बुझ्न १३ वटै स्थानीय तहका १ सय ३५ वटै वडामा पुग्ने निर्णय गरेको हो । ‘यसअघि उद्धार, राहत र सहयोग लिएर सम्बन्धित पालिकामा हामी, पार्टीका साथीहरु र भातृ संगठनहरु पुगिसकेका छौं, मृतक सबैका परिवारलाई समवेदना दिन र अवस्था बुझ्न जिल्ला कार्यसमिति र पार्टीका नेता कार्यकर्ताहरु अनिवार्य जाने निर्णय गरेका छोैं,’ निर्णय सुनाउँदै जिल्ला सभापति तीर्थ लामाले भन्नुभयो ।
जिल्लाका पदाधिकारी, नेताहरु जिल्लाका १ सय ३५ वटै वडामा पुग्नेछन् भने जिल्ला सदस्यहरु सम्बन्धित भूगोलमा ज्यान गुमाउनेका परिवारमा अनिवार्य पुग्नुपर्नेछ । उनीहरुले समवेदना प्रकट गर्नुका साथै आवस्यकताका हेरेर सहयोग गर्नेछन् ।
बैठकले विपद प्रभावित काभ्रेमा खानेपानी, सडक पूर्वाधारको समस्या भएको भन्दै कांग्रेसले तत्कालको लागि अनुदान पठाउन सरकारसँग माग गरेको छ । त्यसैगरी बाढी र पहिरोबाट प्रभावित काभ्रेका १३ वटै स्थानीय तहलाई विपद संकटग्रस्त पालिका घोषणा गर्न सरकारको ध्यानाकर्षण समेत गराएको छ ।
