काभ्रे,
आलुको हबका रुपमा परिचित पनौति नगरपालिका कुशादेवी क्षेत्रका किसाहरु यो बर्ष आलु उत्पादन घट्ने भन्दै चिन्तित बनेका छन् । असोज ११ र १२ गतेको वर्षापछिको बाढी र पहिरोले यस क्षेत्रमा आलुखेतीमा क्षती पुगेपछि किसान चिन्तित बनेका हुन् । बाढी र पहिरोले यस क्षेत्रमा ५६ करोड ६१ लाख भन्दा बढिको कृषिबाली नष्ट गरेको छ । पनौती नगरपालिकामा मात्र एक करोड भन्दा धेरैको आलु उत्पादन हुने गर्छ । तर यसपटक बाढी र पहिरोका कारण करीब १५ सय रोपनीमा क्षती पुगेको छ ।
नयाँ गाउँका मोहनप्रसाद बजगाँईले विगत १५ वर्षदेखि व्यवसायिक रुपमा आलु खेती गर्दै आउनुभएको छ । तर यसपाली सात रोपनीमा लगाएको आलुमध्ये, आधा भन्दा धेरै पहिरोले बगाइदिएपछि उहाँ चिन्तामा हुनुहुन्छ । दुख गरेर लगाएको आलु भित्राउने बेलामा पहिरोले नष्ट गरेपछि किसान चिन्तामा परेका हुन् ।
आलु फलाएर जीवन चलाउँदै आएका किसान पहिरोले घर र खेतबारी नै बगाएपछि के गर्ने कसो गर्ने रनभुल्लमा छन् । उनीहरु थातथलो छोडेर अन्त सर्न सकेका छैनन् । बरु स्थानीय सरकारबाट क्षतिपूति पाउने अपेक्षामा छन् ।
कृषि विकास कार्यालयको तथ्याङ्क अनुसार काभ्रे जिल्लामा वार्षिक एक लाख ८८ हजार दुई सय ८५ मेक्ट्रिटन आलु उत्पादन हुने गरेको छ । जसले काठमाडौँको आधा माग धान्दै आएको थियो । तर यसपाली बाढी पहिरोले आलुको उत्पादन आधा भन्दा धेरैले घटाउने किसानहरु बताउँछन् ।
