फागुन २४,
२०७७,काभ्रे/
१११ औँ अन्तराष्ट्रिय महिला दिवस काभ्रे जिल्लामा विभिन्न कार्यक्रम गरि मनाईएको छ । जिल्लाका स्थानिय तह सँगै विभिन्न सरकारी तथा गैर सरकारी संस्था लगाएत शैक्षिक संस्थाहरुमा पनि महिला दिवस मनाईएको छ ।
यसैबिच जिल्लाको तेमाल गाउँपालिकाले महिला दिवसको अवसरमा शुभकामना आदानप्रदान तथा अन्तर्क्रिया कार्यक्रम गरी मनाएको छ । गाउँपालिकाका अध्यक्ष सलाम सिं तामाङको प्रमुख आतिथ्यतामा सम्पन्न कार्यक्रमको गाउँपालिका उपाध्यक्ष दुर्गामायाँ तामाङको सभाध्यक्षता रहेको थियो ।
कार्यक्रममा महिलामा माथि हुने घरेलु हिँसा, सार्वजनिक स्थलमा हुने हिँसा, वालविवाह साथै महिलाको हक हित संरक्षण लगायत विषयमा अन्तर्क्रिया भएको गाउँपालिका उपाध्यक्ष दुर्गामायाँ तामाङले जानकारी दिईन् । यस्तै अन्तर्क्रियामा उठेका विषयको गाउँपालिकाले न्युनिकरणको निमित्त पहलकदकी गर्ने पनि उनले जानकारी दिईन् ।
कार्यक्रममा गाउँपालिकाका प्रमुख प्रशासकिय अधिकृत लक्ष्मण कुँईकेल, वडा नं ६ का अध्यक्ष बिकुलाल तामाङ, कार्यपालिका महिला सदस्यहरु, गाउँपालिकाका कर्मचारी, महिला स्वयंसेविका, शिक्षक शिक्षिकहरु लगाएत १ सय भन्दा बढि महिलाहरुको उपस्थिति रहेको थियो ।
तेमालमा कोरोना विरुद्ध खोपको दोश्रो दिनः
यसैबिच दोश्रो चरणको कोरोना विरुद्धको खोप अभियानको दाश्रो दिन आज गाउँपालिकाको वडा नं ९ मा सञ्चालन भएको थियो । वडा नं ९ को महिनाजङ स्वास्थ्य ईकाईमा खोप कार्यक्रम भएकोमा ८९ जनाले खोप लगाएको गाउँपालिकाका स्वास्थ्य शाखा प्रमुख शिवहरी पाठकले जानकारी दिए ।
