काभ्रे,
काभ्रेको प्रतिनिधिसभा क्षेत्र १ प्रदेशसभा क को सदस्यमा नेकपा (माओवादी केन्द्र) का रत्न ढकाल भारी मतका साथ विजयी हुनुभएको छ । आज (विहीबार) सम्पन्न मत गणनामा ९हजार ४४२ को भारी मतान्तरसहित ढकाल विजय हुनुभएको हो । बागमती प्रदेशका युवा तथा खेलकुद मन्त्री समेत रहेका ढकालले २० हजार ७२० मत प्राप्त गर्नुभएको छ भने उँहाका निकटतम प्रतिद्वन्द्वी नेकपा एमालेका उम्मेदवार दिलबहादुर तामाङ (दिलिप) ले ११ हजार २७८ मत प्राप्त गर्नुभएको छ ।
त्यस्तै वाम–लोकतान्त्रिक गठबन्धनका तर्फबाट उम्मेदवार बनेर विजय भएका ढकाल माओवादी केन्द्रका केन्द्रिय सदस्य समेत रहनुभएको छ । उँहाले विजय भएपछि सञ्चारकर्मीसँग बोल्दै अघिल्लो कार्यकालमा अपुरा रहेको काम पुरा गर्ने र जनताकै बिचमा रहेका काम गर्ने बताउनुभएको छ । यसअघि ०७४ सालको निर्वाचनमा ढकाल यही निर्वाचन क्षेत्रबाट विजय हुनुभएको थियो ।
