काभ्रे,
काभ्रेपलाञ्चोक जिल्लाको मण्डनदेउपुर नगरपालिकालाई बालमैत्री नगर घोषणाका लागि कार्य योजना निर्माण गरिएको छ । नगरपालिकाले बालमैत्री नगरपालिकाका लागि १३ बुँदे प्रतिबद्धता गरेको छ । नगरपालिका र ईको हिमाल नेपालको संयुक्त आयोजनामा भएको नवनिर्वाचित जनप्रतिनिधि एवं पदाधिकारीलाई दिइएको बाल अधिकार सम्बन्धि ३ दिने तालिममा अन्तिम दिन बाल मैत्री नगर घोषणाका लागि प्रतिबद्धता र कार्य योजना निर्माण गरिएको हो ।
दुई वर्षभित्र सिँगो नगरपालिकालाई बालमैत्री नगर घोषणा गर्ने गरी कार्य योजना तयार भएको बताईएको छ । नगरप्रमुख वाईबाले नगरपालिकाले शिक्षामा सबैभन्दा ठूलो लगानी गरेको जनाउनुभएको छ । शिक्षा, स्वास्थ्यमा लगानी गरिरहेका बताउदै अब बाल मैत्री नगरपालिका घोषणाका लागि विशेष कार्यक्रम नै बनाएर अघि बढ्ने उँहाको भनाई छ । राष्ट्रिय बाल अधिकार परिषद्ले सहजीकरण गरेको तालिममा बालमैत्री नगर बनाउनको लागि वडा अध्यक्ष, कार्यपालिका सदस्य, वडा सदस्य र नगरपालिकाका कर्मचारीरको सहभागिता रहेको थियो ।
