रोशी सहकर्मी, असोज २५
जिल्लाको रोशी गाउँपालिका ३ का वडा अध्यक्ष धनजित लामालाई अपहरणको प्रयास गर्ने दुई युवालाई प्रहरीले संरक्षण गरेको भन्दै राष्ट्रिय प्रजातन्त्र पार्टी काभ्रेले आपत्ती जनाएको छ । राप्रपा जिल्ला सचिवसमेत रहेका जननिर्वाचित वडा अध्यक्ष लामालाई गत सोमबार राति विप्लव समुहको कार्यकर्ता रहेको बताउने कृष्णबहादुर मगर र पोते लामाले आफुलाई अपहरण गर्ने प्रयास गरेको उनले बताए । “तपाईलाई अपहरण गर्न आएको र वडा कार्यालय पनि जलाउने” भन्दै आएका दुई युवा परिवारको प्रतिकार पछि भागेको उनको भनाई छ ।
शुक्रबार राप्रपा पार्टी कार्यालय बनेपामा पत्रकार सम्मेलन गरी वडाअध्यक्ष लामाले खहरेपागु चौकीमा लिखित जाहेरी दिएर पक्राउ परेका दुई युवालाई जिल्ला प्रहरी कार्यालय धुलिखेल प्रमुखको आदेशमा गाउँकै एक व्यक्तीको जमानीमा छाडेको बताए । अपहरणको प्रयास गर्ने माथि कुनै कारवाही नभई छोडेपछि जिल्ला प्रहरी कार्यालयमा जाहेरी दार्खास्त दिन जाँदा प्रहरीले जाहेरी नलिएको उनको भनाई छ ।
उक्त घटनाबारे प्रदेश सांसद चन्द्र लामाले पनि टेलिफोन मार्फत सामान्य कुरालाई ठुलो नबनाउन आफुलाई सुझाव दिएको उनले बताए । वडाध्यक्ष लामाले भने, ‘अपहरण र ज्यानै मार्ने धम्की दिने पनि सामान्य रुपमा लिनुभयो सांसद ज्यूले ।’ वडाध्यक्ष लामाका अनुसार राति अपहरण गर्न आएकासँग चर्काचर्की परेपछि छिमेकी गाउँलेहरुले थाहा पाए र उनीहरु निस्किएर गए ।
राप्रपाका जिल्ला अध्यक्ष टुल्कु लामाले तत्काल उनीहरुलाई कारवाही नगरे आन्दोलनमा जाने चेतावनी दिए । “के कानुन ठुलाले जे भन्यो त्यही हुने हो, अपहरण गर्न आएको किटानी सहित नाम दिदाँ किन कारवाही गदैन प्रहरी” उनले आक्रोस पोख्दै भने ।

Facebook Comments